Саха сирин киин оройуоннарыгар бу нэдиэлэҕэ хайдах күн-дьыл туруоҕай?
Нэдиэлэ устата Саха сирин киин оройуоннарыгар тыал хайысхата уларыйдаҕына, буруолаах буолара күүтүллэр. Бу туһунан Гидрометеорологияҕа уонна тулалыыр эйгэни кэтээн көрүүгэ Саха сиринээҕи управление – Гидрометкиин начаалынньыга Татьяна Маршалик сэрэттэ. “Бүгүн хара сарсыардаттан Дьокуускайга буруо сыта баара, эбиэт саҕана балаһыанньа тубуста, тоҕо диэтэххэ, тыал хайысхата хотугулуу-илин диэки уларыйда. Нэдиэлэ устата арҕаа диэки циклон барыаҕа, ол иһин тыал хайысхата киин оройуоннарга, ол иһигэр Дьокуускайга, илин уонна хотугулуу-илин диэки буолуоҕа. Буруолаах буолуо эрээри, балаһыанньа тыал хайысхатыттан уларыйыан сөптөөх”, —диэн Маршалик сэрэттэ.
Кини этэринэн, чугастааҕы күннэргэ өрөспүүбүлүкэ бүттүүн сиригэр-уотугар куйаас күн-дьыл туруоҕа, салгын температурата +31 — +36 кыраадыска тэҥнэһиэҕэ. Арҕааҥҥы уонна Халыма-Индигир улуустарыгар температура намыһах, кыра сөҥүүлээх, Мииринэй, Ленскэй уонна Сунтаар оройуоннарыгар – этиҥнээх. “Маннык күн-дьыл чугастааҕы кэмҥэ туруоҕа, бэл, арҕаа ардах түһэригэр усулуобуйа суоҕун тэҥэ. Хотугулуу-илин эрэ кыратык ардыан сөп. Эрэгийиэн киин өттүгэр +28 — +33 кыраадыс буолара күүтүллэр. Ону сэргэ нэдиэлэ устата буруоланыан да сөп”, — диэтэ Татьяна Маршалик.
Виктория Сергеева, СИА
Бэлэмнээтэ Женни Стрюкова