2019 сылга «Саха сирин киэн туттуута» норуот бириэмийэтэ үлэтин салгыаҕа.
edersaas.ru
Ааспыт сылга «Сахамедиа» холдинг бу бырайыага араас номинацияларынан араартаан, норуот хаһаайыстыбатын кэккэ салааларыгар үлэлии сылдьар дьону киэҥ эйгэҕэ таһааран билиһиннэрбитэ.
— Бу бырайыакка аттыбытыгар үлэлии сылдьар учууталлар, экологтар, эмчиттэр, култуура диэйэтэллэрэ, тыа хаһаайыстыбатын уонна промышленность үлэһиттэрин тустарынан бэрт үгүһү билэн, кинилэр ситиһиилэриттэн сөхпүппүт, — диэн Ил Дархан Айсен Николаев бэлиэтээбитэ. Оттон бырабыыталыстыба бэрэссэдээтэлэ Владимир Солодов: «Саха сирин киэн туттуута» бириэмийэ лауреаттарын курдук дьон сыралаах үлэлэриттэн Саха сирин ситиһиитэ саҕыллар», — диэн эппитэ.
Ааспыт сылга бырайыакка номинаннарга 394988 куолас киирбитэ. Бу өрөспүүбүлүкэ олохтооҕун 40%-на. Оттон «Бастыҥ быраас» номинацияҕа 97 тыһ. киһи куолаһа киирэн сөхтөрбүтэ. «Саха сирин киэн туттуута» бырайыак ааптара Григорий Фоменко бэлиэтииринэн, бириэмийэ дьону түмэн, биир тыыннаабыта уонна сомоҕолообута.
Бырайыакка туох уларытыы киирдэ?
Төһө да өрөспүүбүлүкэ 34 улууһун олохтоохторо кыттыбыттарын үрдүнэн, финалга 17 эрэ бөдөҥ муниципальнай тэриллиилэр бэрэстэбиитэллэрэ тахсыбыттара. Ол сүрүннээн Дьокуускай, Амма, Нам, Чурапчы, Уус Алдан, Нерюнгри, Бүлүү уо.д.а киин улуустар. Бырайыагы сүрүннээччилэр үөрэтэн көрүүлэринэн, Аллайыахаҕа олорор номинант хайдах да Бүлүү улууһугар олорор кыттааччыны кытта күрэстэһэр кыаҕа суох. Тоҕо? Аллайыахаҕа 2718 киһи олорор буоллаҕына, Бүлүү улууһугар бу сыыппара уон төгүл куоһарыллара чахчы. Онон хайдах да баҕарбытыҥ иһин, куонкуруска кыттар хоту улуус олохтооҕо киин улуус номинанын кытта уон сыл да устата күрэстэстэҕинэ да кыайар суох. Маныаха интернет суоҕун, сибээс мөлтөҕүн эбэн кэбис. Ол иһин бырайыак быраабылатыгар быйылгыттан ыла уларытыы киирдэ. Ол эбэтэр куонкуруска кыттар дьон олорор улуустарыгар нэһилиэнньэ ахсаана, мобильнай интернет баара-суоҕа учуоттанар буолуоҕа. Ону тэҥэ интернет-куоластааһын тэҥэ куолаһы СМС-иһитиннэрии нөҥүө эмиэ ылыахтара. Күҥҥэ биир киһиттэн биир эрэ куолас ылыллар.
2019 сылга «Саха сирин киэн туттуута» бырайыакка ханнык номинациялар баар буолуохтарай? Куоластааһын ханнык ыйдарга ыытыллыаҕай?
Номинациялар уонна куоластааһын ыытыллар ыйдара
- «Эколог-Доброволец” — тохсунньу
- «Дипломат» — олунньу
- “ОДьКХ үлэһитэ” — кулун тутар
- “Тыа сирин үлэһитэ» — муус устар
- «Предприниматель» — ыам ыйа
- «Эмчит» — бэс ыйа
- «Тутааччы династия» — от ыйа
- «Шахтёр» — атырдьах ыйа
- “IT-технология” — балаҕан ыйа
- «Учуутал» — алтынньы
- «Быыһааччы» — сэтинньи
- “Тыйаатыр диэйэтэлэ” — ахсынньы
- Дьоруойдар күннэригэр 2019 с. ахсынньы 9 күнүгэр «Сахамедиа» АУо салалтата бэйэтин анал бирииһин туттарыаҕа.
Дьэ, онон, күндү ааҕааччыларбыт, бу номинацияларынан көрөн, бэйэҕит биир дойдулаахтаргытын «Саха сирин киэн туттуута» бириэмийэ бырайыагар кытыннарарга былааннааҥ.
Елена ПОТОЦКАЯ, «Саха сирэ» хаһыат, edersaas.ru