Саха Өрөспүүбүлүкэтигэр 2017 сылтан “Саха сирин киэн туттуута” (“Гордость Якутии”) диэн норуот бириэмийэтигэр араас салааҕа үлэлиир бастыҥнары быһаарар бырайыак үлэлиир.
edersaas.ru
“Саха сирин киэн туттуута” бириэмийэни “Сахамедиа” холдинг («Якутия», «Саха Сирэ» хаһыаттар, Саха информационнай агентство (СИА), “Эдэр саас” сайт киирэллэр) көҕүлээн уонна тэрийэн ыыталлар. Бириэмийэ спонсордара – сахалыы иһити оҥорор “Көмүлүөк” хампаанньа уонна “Киэргэ” ювелирнай фирма.
2019 сыл атырдьах ыйын 5 күнүттэн саҕаламмыт “Медицинскэй үлэһит” номинацияҕа куоластааһын хаһааҥҥытааҕар да тыҥааһыннаахтык уонна көхтөөхтүк ыытылынна. Аҥардас биир күҥҥэ кэнникиттэн инники күөрэс гыныы эбэтэр кэннигэр хаалыы түгэннэрэ эмиэ бааллара. Ол курдук, куоластааһын саҕаланыытыгар Светлана Яковлева барыларыттан инники испитэ. Онтон нэдиэлэ ортото Сергей Купряков 326 куолаһынан биэтэккэ киирбитэ. Роман Васильев үһүс, Василий Якушев төрдүс миэстэлэргэ тахсыбыттара, салҕыы Наталья Долгунова уонна Саина Слепцова сылдьыбыттара.
Дьэ, онтон биэс бастыҥ иһигэр кимнээх киирбиттэрэ биллибитэ.
Баһыйар куоластаммыттара
Сергей Купряков – Өрөспүүбүлүкэтээҕи 1-кы №-дээх балыыһа-Медицина национальнай киинин педиатрияҕа киинин урологияҕа отделениетын сэбиэдиссэйэ (3660 куолаһы ылан);
— Светлана Яковлева —— Дьокуускай куорат “Аврора” медицинскэй килииникэтин дириэктэрэ (3334);
— Роман Васильев —— Өрөспүүбүлүкэтээҕи 3-с №-дээх балыыһа эндоскопияҕа отделениетын сэбиэдиссэйэ (2459);
— Василий Якушев — Өрөспүүбүлүкэтээҕи 2-с №-дээх балыыһа анестезиологияҕа-реанимацияҕа отделениетын анестезиолог-реаниматолог бырааһа (1988).
— Саина Слепцова — Өрөспүүбүлүкэтээҕи 2-с №-дээх балыыһа-Суһал медицинскэй көмө киинин функциональнай диагностикаҕа отделениетын медицинскэй сиэстэрэтэ (1653).
Оттон кыайыылаах аата атырдьах ыйын 16 күнүгэр биллибитэ.
“Медицинскэй үлэһит” номинацияҕа 155 куолаһынан баһыйан, Өрөспүүбүлүкэтээҕи 3 №-дээх балыыһа эндоскопияҕа отделениетын сэбиэдиссэйэ Роман Васильев 11232 куоластанна. Иккис миэстэҕэ Сергей Купряков (11077), үһүс миэстэҕэ Василий Якушев (5457), төрдүс миэстэҕэ Наталья Долгунова (2044), бэһискэ Саина Слепцова (1254) таҕыстылар.
Кыайыылааҕы эҕэрдэлээһин
Атырдьах ыйын 20 күнүгэр “Сахамедиа” өрөспүүбүлүкэтээҕи кииҥҥэ баппат элбэх киһи муһунна. Кинилэр “Медицинскэй үлэһит” номинация кыайыылааҕын уонна финалга тахсыбыт биир идэлээхтэрин эҕэрдэлии кэллилэр.
Кинилэри СӨ доруобуйа харыстабылын миниистирин солбуйааччы Марина Максимова, СИА кылаабынай эрэдээктэрэ Вячеслав Стручков, “Саха сирин киэн туттуута” бырайыагы сүрүннээччи Прокопий Бубякин, Амма улууһун баһылыга Николай Архипов, Өрөспүүбүлүкэтээҕи 3-с №-дээх балыыһа кылаабынай бырааһа Ольга Татаринова уо.д.а. эҕэрдэлээтилэр. Кыайыылаахха “Көмүлүөк” хампаанньа улахан чорооно уонна диплом туттарылынна.
Кыайыылах Роман Васильев:
«Үрдүк наҕарааданы ылан туран эттэхпинэ, бу мин үлэбэр эрэ буолбакка, өрөспүүбүлүкэтээҕи 3-с №-дээх балыыһа үлэһиттэригэр үрдүк сыанабыл. Бэйэм кэлэктииппинэн киэн туттабын, миигин өйөөбүт уонна бу кэскиллээх бириэмийэни итэҕэйбит балыыһам сэбиэдиссэйдэригэр, быраастарыгар, орто уонна алын сүһүөх медицинскэй үлэһиттэригэр, техническэй үлэһиттэригэр махтанабын. Кинилэр бары куоластааһын бүтэһик мүнүүтэтигэр диэри миэхэ “ыарыйдылар”. Биир идэлээхтэрбэр, устудьуоннар этэрээттэрин байыастарыгар, Амма улууһун, чуолаан төрөөбүт Бөтүҥүм олохтоохторугар, махтанабын”, — диэтэ.
Саха сирин киэн туттуута” бириэмийэ “Медицинскэй үлэһит” номинацията үрүҥ халааттаах аанньаллар нэһилиэнньэ ортотугар улахан аптарытыатынан туһаналларын, кинилэргэ итэҕэйэллэрин өссө төгүл көрдөрдө.
Бириэмийэ бары кыайыылаахтарыгар 2020 сылга Кыайыы күнүгэр үрүҥ көмүс бэлиэлэри туттарыахтара.
Кини кимий?
Роман Васильев Амма улууһун Бөтүҥ сэлиэнньэтигэр күн сирин көрбүтэ. Ийэтэ сэллиги эмтиир балыыһаҕа үлэлээбитэ. Уолчаан ийэтин балыыһатыгар сылдьан, үрүҥ халааттаах аанньаллар үлэлэрин илэ хараҕынан көрөн улааппыта. Ийэтэ уола Рома эмиэ быраас буолуон баҕарара.
Роман Романович оскуолатын бүтэрэн баран, Коми Өрөспүүбүлүкэтигэр аармыйаҕа пограничнигынан сулууспалаабыта. Отделение хамандыырынан уонна сэбиэскэй аармыйаҕа туйгун сулууспалааччынан ааттаммыта.
Дьокуускайга Саха судаарыстыбаннай университетын медицинскэй факультетыгар салайар дьоҕурдааҕын таба көрөн, ыстаарыстанан талбыттара, ону сэргэ үс сыл устата “Медик” устудьуоннар этэрээттэрин салайбыта. Кини этэрээтэ Нам улууһугар сүөһү турар хотоннорун тутан, үс төгүл социалистическай күрэхтэһии кыайыылааҕынан тахсыбыта.
1984 сыллаахха медицинскэй факультеты бүтэрэн баран, Дьокуускай куораттааҕы клиническэй балыыһаҕа эндоскопист-бырааһынан үлэлээбитэ. Клиническэй ординатураны Пирогов аатынан Москватааҕы судаарыстыбаннай институт уопсай хирургияҕа кафедратыгар барбыта.
Юрмалаҕа лазернай эндоскопияҕа үөрэнэн, куртах бааһыгар уонна синньигэс оһоҕоско лазерынан ыарыһахтары ситиһиилээхтик эмтээбитэ.
1990 сыллаахха кини кыттыытынан “Саха сирин көмүстэрэ” компанияҕа поликлиника-стационар сулууспатын кэбиниэтэ аһыллыбыта.
Роман Романович иллэҥ кэмигэр чэпчэки атлетиканан, хайыһарынан дьарыктаммыта, факультет сүүмэрдэммит хамаандатыгар баара. “Социалистическая Якутия” хаһыат бирииһигэр Кыайыы эстафетатыгар үс сыл устата тэҥнээхтэрин булбатахтара.
2003 сыллаахха Өрөспүүбүлүкэтээҕи 3-с нүөмэрдээх балыыһа эндоскопияҕа отделениетын салайбыта. Доруобуйа харыстабылыгар 35 сыл үлэлээбит Роман Васильев – үрдүк категориялаах эндоскопист-быраас, СӨ доруобуйатын харыстабылын туйгуна, “Өрөспүүбүлүкэтээҕи 3 нүөмэрдээх балыыһа диагностикаҕа сулууспатын бастыҥ бырааһа” уонна “Идэҕэ бэриниилээх буолуу” номинациялар кыайыылаахтара.
Надежда ЕГОРОВА, “Саха сирэ”, edersaas.ru
Мария Васильева хаартыскаҕа түһэриилэрэ