“Саха сирин киэн туттуута” бириэмийэ “Урбаанньыт” номинациятын кыайыылааҕа — Михаил Охлопков
“Сахамедиа” холдинг “Саха сирин киэн туттуута” өрөспүүбүлүкэ үлэһит дьонугар-сэргэтигэр анаан тэрийбит куонкуруһа 2018 сылтан ситиһиилээхтик ыытыллар.
Бу күннэргэ бириэмийэ “Урбаанньыт” номинациятын түмүгэ таһаарылынна. Күөн күрэскэ түөрт улуустан аҕыс киһи кытынна. Түмүктүүр куоластааһыҥҥа инники күөҥҥэ “Адгезия” ХЭУо (Дьокуускай) дириэктэрэ Михаил ОХЛОПКОВ тахсан, номинация кыайыылааҕынан буолла. Киниэхэ 2970 киһи куолаһын биэрбит.
М.Ф.Охлопков салайар “Адгезия” хампаанньата Дьокуускайга 130 миэстэлээх перинатальнай киини, оҕолорго аналлаах өрөспүүбүлүкэтээҕи реабилитационнай киини, Үөһээ Бүлүүгэ 3000 миэстэлээх, сылаас манежтаах стадиону, Уус-Алдаҥҥа, Аммаҕа, Анаабырга оҕо саадтарын, о.д.а. баараҕай эбийиэктэри туппута.
“Сахамедиа” генеральнай дириэктэрин солбуйааччы Роман Пестерев кыайыылааҕы истиҥник эҕэрдэлээтэ. Үлэһит дьону норуот куоластаан талыыта дьиҥ-чахчы улахан суолталааҕын, бастыҥтан-бастыҥнар талыллалларын бэлиэтээтэ. Номинация кыайыылаахтарынан тахсыбыт дьон атыттарга үтүө холобур, үлэҕэ сирдьит буолалларын ыйда.
Салгыы Мария Павлова СӨ Урбааҥҥа министиэристибэтин аатыттан истиҥник эҕэрдэлээн туран, бу өссө үрдүк эппиэтинэһи сүгэргэ мэктиэлиирин бэлиэтээтэ, кыайыылаахха министиэристибэ бэлэҕин туттарда.
Бырайыак саҕаланыаҕыттан өйүүр, бэриниилээхтик үлэлэһэр, сахалыы кырасыабай иһиттэри оҥорор “Көмүлүөк” компания дириэктэрэ Ольга Григорьева:
—Биһиги “Сахамедиа” холдинг тэрийэр куонкуруһун өйөөн, кыайыылаахха чороон туттарабыт. Бу чорооммут сыыйа улааттар-улаатан иһэр. Бүгүн бу үөрүүлээх уонна долгутуулаах күҥҥэ кубок-чорооммутун урбаанньыт Михаил Охлопковка бары үтүөнү баҕаран туран уунабыт, — диэтэ, дохсун ытыс тыаһыгар доҕуһуоллатан бэртээхэй бэлэҕи күөн күрэс кыайыылааҕар туттарда. Урбаанньыт үлэтэ олус эппиэтинэстээҕин, үгүс сыраны ирдиирин, урбаанньыт дьону үлэлээх оҥорорун, хамнастыырын, оттон төлүүр нолуога өрөспүүбүлүкэ сайдыытыгар барарын бэлиэтээтэ. Михаил Охлопков курдук дириҥ толкуйдаах, үлэһит, туруоруммут сыалын-соругун ситиһэр дьулуурдаах дьон чахчы да үтүө холобур буолалларын эттэ.
Саха сирин тутааччыларын түмсүүтүн салайар Айхал Габышев:
—Тутуу – олоҕу сайыннарар, экономиканы хамсатар сүдү күүс. Маныаха төрөөбүт Сахатын сирэ сайдарын туһугар ахсаабат кыһамньытын уурар кэллиэгэбит, өрөспүүбүлүкэ киэн туттар киһитэ Михаил Охлопков кыайыыта барыбытыгар улахан үөрүү. Кини, чахчы, кыайыаҕын кыайда! , — диэтэ астыммыт, үөрбүт быһыынан.
Михаил Охлопковка дохсун ытыс тыаһыгар доҕуһуоллатан, “Эҕэрдэ!” хаһыынан айхалланан “Көмүлүөк” маҕаһыын кубок-чорооно, СӨ урбааҥҥа министиэристибэтин, СӨ тутааччыларын түмсүүтүн бэлэхтэрэ туттарылыннылар.
“Урбаанньыт” номинация кыайыылааҕа Михаил Охлопков күөн күрэһи тэрийээччилэргэ, бииргэ үлэлиир кэллиэгэлэригэр, кинини өйөөбүт дьоҥҥо-сэргэҕэ махтал тылларын тиэртэ:
—“Саха сирин киэн туттуута” бириэмийэ “Урбаанньыт” номинациятыгар бииргэ үлэлиир дьонум – инженердэр кыттарбар көҕүлээбиттэрэ. Бу биһиги хамаанданан үлэбит ситиһиитэ, — диэн үөрүүтүн үллэһиннэ.
Түмүккэ, бырайыак эрэдээктэрэ Прокопий Бубякин сайын, төһө да үлэ-хамнас үгэннээн турар кэмэ буоллар, куоластааһын түмүккэ ордук тыҥааһыннана сылдьыбытын, дьон көхтөөхтүк кыттыбыттарын бэлиэтээтэ. Кыайыылааҕы эҕэрдэлээтэ, илии тутуста.
Финалга киирбит биэс урбаанньыттан Руслан Шипков, “Сахаметан” хааччахтаммыт эппиэтинэстээх тэрилтэ толорооччу дириэктэрэ — 2050 куолаһы ылбыт. “Рассвет” биисинэһи, нолуогу, үбү-харчыны ааҕыыга сүбэлиир, көмөлөһөр өҥөнү оҥорор киини салайар Олег Юденко (Алдан) 1613 куоластаах үһүс бочуоттаах миэстэҕэ тахсыбыт. “Улыбка” оҕону сайыннарар киин дириэктэрэ, “Саха сирин оҕолоро” өрөспүүбүлүкэтээҕи уопсастыбаннай түмсүүнү салайар Валентина Старцева — 354, “СахаТехКонсалт” компания бөлөҕүн генеральнай дириэктэрэ Светлана Семенова 67 куолаһы ылбыттар.
Аныгыскы күөн күрэс мэдиссиинэ эйгэтин үлэһиттэригэр ананар.
Сардаана БАСНАЕВА, «Саха сирэ» хаһыат, edersaas.ru