Саха сирин IX спортивнай оонньууларын былааҕа Ньурба нэһилиэктэрин кэрийэр!

Уус Алдан улууһугар Бороҕоҥҥо Саха сирин норуоттарын VIII спортивнай оонньууларын түмүктүүр дьоро киэһэтигэр, Саха сирин IX спортивнай оонньуулара 2027 сылга Күөх Ньурбаҕа ыытыллара биллэриллибитэ.

Ньурба дьоно-сэргэтэ бу иһитиннэриини үөрэн-көтөн уруйдаабыттара-айхаллаабыттара. Ньурба улууһа бу быһаарыыны ситиһэргэ элбэх үлэни ыыппыта. Саха сирин успуордун кэмитиэтигэр бу иннинэ иккитэ төхтүрүйэн сайаапка түһэрэ сылдьыбыттара. “Туох барыта үһүстээх” диэбиккэ дылы, быйыл үһүс сайаапкаларынан Хаҥалас улууһун биир баалынан куоһаран, спартакиаданы ыытар чиэскэ тиксибиттэр.

От ыйын 18 күнүгэр Оонньуу былааҕа Уус Алдантан айаннаан Ньурба улууһун кыраныыссатыгар кэлбитэ. Бу күнтэн ыла былаах Ньурба 19 нэһилиэгинэн сылдьан баран, түмүккэ Ньурба куоракка тиийиэхтээх. Былааҕы Уус Алдаҥҥа кыайыыны ситиспит, хамаандаҕа мэтээл аҕалбыт ньурбалар, олохтоох спортсменнар арыаллаан нэһилиэктэргэ киллэрэллэр. Кинилэри кытта улуус баһылыгын социальнай боппуруостарга солбуйааччы Анна Уларова тэҥҥэ сүүрэн иһэр:

— Биһиги улууспутугар 30 сыл тухары өрөспүүбүлүкэ таһымнаах успуорт оонньуулара ыытыллыбытаҕа. 1997 сыллаахха Манчаары бирииһгэр улахан күрэхтэһиини ыыппыппыт. Оччолорго курулас ардах да быыһыгар буоллар, бэрт үрдүк таһымнаах тэрээһин буолбута. Дьон билигин даҕаны ол кэмнэри ахтар, саныыр. Биэс сыл диэн ыраах курдук эрээри, тэрээһин үлэтин барыллаан көрдөххө, эмиэ да олус чугас курдук диэххэ сөп. Ити кэм иһигэр элбэх успуорт эбийиэктэрин тутуохпут, дьону-сэргэни, оҕолору чөл, чэгиэн олоххо тардыахпыт, спортивнай таһыммытын үрдэтиэхпит. Дьон сүргэтин көтөҕөр улахан дьыала саҕаланна!

Кырдьык, дьон бу сонунтан үөрбүтэ харахха быраҕыллар. От үгэнэ буолан, көрсүһүү тэрээһинигэр элбэх дьону муспат туһунан быһаарыы ылыллыбыт да буоллар, былааҕы тутааччылары нэһилиэк аайы көрсөөччү балай да элбэх.

Маарга ардах түһэн дьон оттуурун тохтоппут уонна былааҕы аҕалыыларын көрсө элбэх киһи кэлбит. Кулууп дириэктэрэ Саргылана Федорова: “Оройуоммут кииниттэн чугаспыт. Манна биир эмэ күрэхтэһиини ыытар туһугар киирсиэхпит этэ. Суол кытыытыгар турарбытынан бэрт табыгастаах. Спортивнай эбийиэк тутулуннаҕына, күрэхтэһиини үрдүк таһымнаахтык ыытыахпыт этэ”, — диэн санаатын үллэстэр.

Күрэхтэһии биир эмэ тэрээһинин бэйэлэрин сирдэригэр ыытар туһунан нэһилиэктэр бары кэриэтэ туруорсаллар. Акана нэһилиэгин баһылыга Ефрем Семенов:  “Биһиги дойдубут олус кэрэ сиргэ, Дьөҥкүүдэ эбэ үрдүгэр турар. Манна күрэхтэһиини ыытар сатаммат буоллаҕына, спортсменнар сынньанар, түһэр сирдэрэ оҥордохторуна олус сөптөөх быһаарыныы буолуо этэ”, — диир.

Ньурбаҕа ыраах сытар нэһилиэгинэн ааҕыллар Хорулаҕа былааҕы көрсүүгэ оҕолор эрэ кэлбиттэр. Чугас ойуур баһаара күөдьүйэн, улахан дьон бары уоту утары охсуһа тахсыбыттар. Ол да буоллар, тэрээһин бэрт сэргэхтик ааста. Былаах тутан кэлбит Ньурба мэтээллээх спортсменнара оҕолору кытта икки хамаанда тэрийэн эстэпиэтэҕэ сүүрдүлэр. 

Ити курдук, Ньурба улууһа 2027 сылга Саха сирин IX спортивнай оонньууларын ыытар чиэскэ тиксибититтэн үөрэллэрин биллэрэллэр. 

Егор Карпов, «Саха сирэ» хаһыат.