Саха сирин Ил Дархана Парасковья Павловна Федорова олохтон туораабытынан кутурҕанын биллэрдэ
Саха сирин Ил Дархана Айсен Николаев Саха Өрөспүүбүлүкэтин салалтатын уонна тус бэйэтин аатыттан Парасковья Павловна Федорова бу орто дойдуттан туораабытынан кини дьонугар уонна аймахтарыгар дириҥ кутурҕанын биллэрдэ.
“Парасковья Павловна Саха сирин чулуу кыыһа этэ. Өр сыллаах бэриниилээх үлэтинэн кини Саха сиригэр тыа хаһаайыстыбатын чэчирии сайдыытыгар сүҥкэн кылаатын киллэрбитэ. 1970 сылтан Парасковья Павловна улахан “Хатас” сопхуоһу салайбыта. Сопхуос үлэһиттэрэ кини салалтатынан үүнээйини үүннэриигэ, үрүҥ илгэни үрүлүтүүгэ, эти соҕотоупкалааһыҥҥа үрдүк көрдөрүүлэри ситиспиттэрэ. “Хатас” сопхуос Саха сирин бастыҥ хаһаайыстыбатын аатын ылбыта, — диэтэ Айсен Николаев.
Өрөспүүбүлүкэ баһылыга экэниэмикэ кириисиһин кэмигэр улахан тэрилтэни чөл хаалларыыга үтүөтүн, салайааччы быһыытынан дьүккүөрүн уонна дьоҕурун чорботон бэлиэтээтэ.
Кини Саха сирин аграрнай секторыгар ситиһиилэрэ үгүс судаарыстыбаннай наҕараадаларынан бэлиэтэммитэ. Парасковья Павловна Ленин, Үлэ Кыһыл Знамятын, Бочуот Знагын уордьаннарынан, Саха Өрөспүүбүлүкэтин “Хотугу Сулус” уордьанынан, ССРС уонна Арассыыйа үгүс мэтээллэринэн наҕараададаламмыта. Кини ССКП XXVII сийиэһин дэлэгээтинэн, үс төгүл САССР Үрдүкү Сэбиэтин дьокутаатынан талыллыбыта. РСФСР тыатын хаһаайыстыбатын үтүөлээх үлэһитэ, Саха АССР норуотун хаһаайыстыбатын үтүөлээх үлэһитэ этэ.
“Парасковья Павловна олоххо-дьаһахха бэриниилээҕинэн, үрдүк эппиэтинэһи ирдиир соруктары хорсуннук уонна сөптөөхтүк быһаарарынан, дьоҥҥо-сэргэҕэ чиэһинэй уонна үтүө сыһыанынан саха норуотун дьиҥнээх тапталын уонна ытыктабылын ылбыта. Биһиги өйбүтүгэр-сүрэхпитигэр Парасковья Павловна номоххо киирбит киһинэн, сырдык сулус быһыытынан хаалыаҕа! Төрөөбүт сириҥ эйиэхэ сылаас суорҕан буоллун. Курутуйабыт”, — диэн Саха сирин баһылыга дириҥ кутурҕанын биллэрдэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: сахагов.ру саайтан ылылынна