XV Дьахталлар сийиэстэрин уонна II Уһук Илиннээҕи дьахталлар пуорумнарын дэлэгээттэрэ кулун тутар 3 күнүгэр Луганскай уонна Донбасс Өрөспүүбүлүкэлэриттэн куотан кэлээччилэргэ анаан “Саха сирин ийэлэрэ – Донбасс оҕолоругар” диэн гуманитарнай көмө аһымал аахсыйатын тэрийдилэр.
— Ханнык баҕарар ийэ оҕолору көмүскүүр туһуттан дьиэни-уоту быраҕан, барытын хаалларан, ыраах сиргэ куотан кэлэр ыараханын өйдүүр, сүрэҕэр чугастык ылынар. Бүгүн сийиэс дэлэгээттэрэ оҕолорго анаан кинигэлэри, остуол оонньууларын, канцелярскай табаардары, о.д.а. хомуйан туттардыбыт. Бу баһыылкабыт ийэлэр сүрэхтэрин сылааһын тиэрдиэҕэ диэн эрэнэбит. Өрөспүүбүлүкэ олохтоохторо бу бачыымы өйөөн, аһымал аахсыйа кэҥээн иһэригэр баҕарабыт. Саха сирин дьахталлара уонна ийэлэрэ бэрэсидьиэн Владимир Путин ДНР уонна ЛНР туспа өрөспүүбүлүкэ буолалларын биллэрбитин өйүүбүт, — диэн Дьахталлар түмсүүлэрин сойууһун бэрэссэдээтэлэ Анжелика Андреева эттэ.
Актыбыыс дьахталлар “Ресурсный центр добровольчества” иһинэн тэриллибит суһал ыстаапка “Айар” кинигэ кыһатын оҕолорго аналлаах дьэрэкээн ойуулаах кинигэлэрин, оонньуурдары, “Хабылык”, “Хаамыска” оонньуулары, канцелярскай табаардары, о.д.а. атыылаһан, туттардылар.
Ангелина Васильева, “Саха сирэ” хаһыат, edersaas.ru