Бу – киэҥ көрөөччүгэ туһуламмыт сабыс-саҥа, үчүгэй хаачыстыбалаах, аныгы цифровой оҥоһук. Бырайыак Национальнай художественнай мусуой кэллиэксийэлэрин пропагандалыыр, киэҥник тарҕатан көрдөрөр аналлаах.
edersaas.ru
Саха Өрөспүүбүлүкэтин Национальнай художественнай мусуойа “Култуура” Национальнай бырайыак чэрчитинэн бу “Саха сирин искусствота” диэн бэйэтин бырайыагын билиһиннэрэн (бастайааннай экспозиция устун мультимедиа-гид), Саха сириттэн аан бастакынан РФ Култууратын министиэристибэтин Artefact цифровой платформатын кыттыылааҕынан буолбута.
Оттон бүгүн, от ыйын 15 күнүгэр, мусуойга бэлиэ түгэн буолла — “Саха сирин искусствота” мультимедиа-гид мобильнай сыһыарыыга үлэтэ саҕаланна.
Бу мультимедиа-гид мобильнай сыһыарыыга киһи мусуойга бастайааннай экспозицияҕа турар үлэлэртэн 34 экспонаты (живопись, графика, скульптура, норуот уус-уран айымньылара), аудиогид көмөлөһөөччүлээх, виртуальнайдык, субу баар курдук көрөр. Бырайыак аны омук тылынан версията эмиэ баара кэрэхсэбиллээх.
“Саха сирин искусствота” быыстапка бары экспонаттарыгар «Artefact» бырайыакка маннык ссылканан киириллэр: https://artefact.culture.ru/ru/exhibition/iskusstvo-yakutii. Аудио-гид soundcloud баар: https://soundcloud.com/sakhamuseum.
Төлөбүрэ суох мобильнай сыһыарыыны смартфоннаахтар Google Play уонна AppStore ылаллар.
Разработчиктар, инникитин бу оҥоһугунан Арассыыйа бары мусуойдара, туох да эбии ресурсалары көмөлөһүннэрбэккэ эрэ, туһаналларын курдук, кыһаллаллар.
Artefact AR технологиялары уонна ойуулары “билэр” ураты систиэмэни туттан, үлэлиир. Бу барыта, туһанааччы смартфонун туһаайаат, наадалаах эбийиэгин туһунан информацияны түргэнник ыларыгар кыаҕы үөскэтэр.
Бу бырайыак – уус-уран нэһилиэстибэни үгэс буолбут ньымаларынан билиһиннэрии уонна бүгүҥҥү күн ирдэбиллэрин икки ардыларыгар “далаһа” ууран биэрии кэриэтэ. Онон, мусуой аудиториятын уус-уран өттүнэн сайыннарыы, эстетическэй иитии боппуруостарыгар итиэннэ олохтоохторго уонна сүрүннээн ыччаттарга, ыалдьыттарга Саха сирин култууратын, искусствотын билиһиннэриигэ улахан көмөлөөх буолар.
Билсэр төлөпүөн: 8 (4112) 33-52-79
edersaas.ru