«… Ити биһиги күннээҕи үлэбит, ханнык да дьоруойдуу быһыы буолбатах. Арай, хас да күн устата биир да эмчит утуйбатаҕа. Санитаркалар, сиэстэрэлэр, быраастар бары атахтарыгар туран, тигинэччи үлэлээбиттэрэ. Эмсэҕэлээбит дьон бары тыыннаах хаалбыттарыттан олус үөрбүппүт. Биллэн турар, ыарахан ыарыһахтар бааллара…», – диэн ааспыт сыл ахсынньы 19 күнүгэр Тиксиигэ Ил-18 сөмөлүөт саахалыгар түбэспиттэри быыһааччылары салайбыт Гаврил Собакин биһиги хаһыаппытыгар кэпсээн турар.
Надежда ЕГОРОВА, «Саха сирэ» хаһыат, edersaas.ru
Кини ити этиитин салгыыр үтүө тыллар муус устар 4 күнүгэр Москваҕа хирургия национальнай конгреһыгар этилиннилэр.
«Саха сиригэр олорор, үлэлиир биһиги биир идэлээхтэрбит сүҥкэн үлэни оҥордулар. Бу үтүө санаалаах дьон көмөлөрүнэн ол күн эмсэҕэлээбиттэр бары быыһаммыттара. Кинилэр – дьоруойдар!» – диэн туран, хирурдар Арассыыйатааҕы уопсастыбаларын президенэ Игор Затевахин үрүҥ халааттаах аанньаллары сценаҕа таһаарда.
Бу үрдүк сценаҕа Булуҥнааҕы киин балыыһа кылаабынай бырааһын эмтээһин чааһыгар солбуйааччы Сергей Черкашиҥҥа, өрөспүүбүлүкэтээҕи 2-дээх балыыһа хирургияҕа 2-с отделениетын сэбиэдиссэйэ Артем Староватовка, Травматология киинин салайааччы Гаврил Собакиҥҥа (үлэтэ элбэҕинэн кыайан барбата) бочуоттаах грамоталары туттардылар.
«Хирурдар Арассыыйатааҕы уопсастыбаларын бырабылыанньата Саха сирин үрүҥ халааттаах аанньалларын үлэлэрин үрдүктүк сыаналаабыта кэрэхсэбиллээх! Биһиги эмчиттэрбит сөптөөх быһаарыыларынан, түмсүүлээх дьаһалларынан, сомоҕолоһон үлэлээһиннэринэн эмсэҕэлээбит дьону барыларын быыһаабыттара. Анал суһал көмө кэмигэр кэлбитэ, ол иһигэр, ыксаллаах эпэрээссийэлэр оҥоһуллубуттара», – диэн биир идэлээхтэрин өйүү уонна бу конгресска кытта кэлбит СӨ хирурдарын уопсастыбатын бэрэссэдээтэлэ Михаил Винокуров үөрэн-көтөн туран эттэ.
Дьоруойдарбыт сэмэйдэр:
А.В.Староватов:
«… Биһиэхэ саамай үрдүк наҕараада – эмсэҕэлээбит дьон тыыннаах хаалыылара уонна доруобай буолуулара».
С.Г.Черкашин:
«Ол күн улуустааҕы киин балыыһабытыгар 38 куойканы бэлэмнээбиппит. Биһиэхэ, балыыһа быраастарыгар (киин куораттан эмчиттэр биригээдэлэрэ кэлиэр диэри), Дьокуускай сүрүн балыыһаларын исписэлиистэрэ телемедицина көмөтүнэн сүбэ-ама биэрэ олорбуттара. Ыарахан этэ, ол гынан баран, барыта табыллыбыта».
Надежда ЕГОРОВА, «Саха сирэ» хаһыат, edersaas.ru