Бэс ыйын 4-6 күннэригэр Киров куоракка Арассыыйа 73 эрэгийиэниттэн уонна 7 дойдуттан кэлбит кыттааччылар — биэнсийэлээхтэр көмпүүтэринэн күрэхтэһиилэрэ буолла. Чопчулаатахха, Биэнсийэ пуондатын порталыгар, “Яндекс” көрдүүр систиэмэтигэр, интэриниэт эйгэтигэр куттала суох буолууга, аныгы смартфону туһаныыга күрэхтэстилэр.
edersaas.ru
Өрөспүүбүлүкэ чиэһин “Үһүс саас оскуолатын” курсаннара Алексей Томскай уонна Октябрина Капитонова көмүскээтилэр. Кинилэр 73 хамаандаттан 7-с миэстэни ыллылар.
Биирдиилээн күөн көрсүүгэ, саҥа саҕалааччыларга Алексей Томскай икки хайысханан (интэриниэккэ куттал суох буолуутугар уонна “Яндекска”) икки кыһыл көмүс мэтээли ылла.
Уопуттаах туһанааччыларга Октябрина Капитонова абсолютнай күөн көрсүүгэ 6-с миэстэни ылла. Онон аҕам саастаах дьон көмпүүтэри, интэриниэти, смартфону мөлтөхтүк баһылыыллар диэн сыыһа өйдөбүл буолара өссө төгүл дакаастанна.
Бүтүн Арассыыйатааҕы көмпүүтэргэ элбэх көрүҥнээх IX чемпионат түмүгүнэн, бу аҕам саастаах дьоҥҥо аналлаах бөдөҥ күрэхтэһиигэ Кировскай уобалас хамаандата бастаата, 2-с миэстэни – Марий Эл Өрөспүүбүлүкэтэ, 3-с миэстэни – Москва уобалаһа ыллылар. Бу күрэхтэһиини Арассыыйа биэнсийэлээхтэрин сойууһа, Кировскай уобалас дьаһалтата Биэнсийэ пуондата уонна РФ Үлэ министиэристибэтин өйөбүлүнэн тэрийдилэр.
Дойду үрдүнэн эрэгийиэннээҕи туурдарга 11 тыһыынчаттан тахса киһи кыттыбыт. Финалга 150 киһи талыллан кэлэн, чулуулартан чулуулары кытта киирсибиттэр. Ону тэҥэ, Арменияттан, Белоруссияттан, Германияттан, Данияттан, Италияттан, Литваттан, Финляндияттан кэлбиттэр.
“Үһүс саас оскуолата” Дьокуускай куорат дьаһалтатыгар, Үлэ, социальнай сайдыы министиэристибэтигэр, Өрөспүүбүлүкэтээҕи социальнай хааччыйыы кэлим киинигэр, Биэнсийэ пуондатын салаатыгар, Арассыыйа биэнсийэлээхтэрин сойууһун салаатыгар махталын биллэрэр.
Ангелина Васильева, “Саха сирэ” хаһыат, edersaas.ru