Соҕуруу Сахалинскайга буолар “Азия оҕолоро” норуоттар икки ардыларынааҕы кыһыҥҥы спортивнай оонньууларга 45 хамаандаттан 2 000 эдэр спортсмен спорт аҕыс көрүҥэр илин былдьаһыаҕа.
Аан бастаан ыытыллар күрэхтэһиигэ Саха сирин хамаандата сэттэ көрүҥҥэ – хоккейга, фигурнай хаҥкылааһыҥҥа, хайыһарынан сүүрүүгэ, биатлоҥҥа, сноубордка уонна хайаттан хайыһарынан түһүүгэ – куоталаһыаҕа. Эдэр спортсменнар билигин бэлэмнэнии тиһэх түһүмэҕэр киирдилэр, сорохторо соҕуруу эрчиллэр-бэлэмнэнэр сбордарга сылдьаллар, күрэхтэһиилэргэ кытталлар. Оҕо спордугар, спортивнай солбугу бэлэмнээһиҥҥэ управление (салайааччы Егоров В.И.), спорт кыһыҥҥы көрүҥнэригэр өрөспүүбүлүкэтээҕи оскуолалар хамаандалар бэлэмнэниилэригэр бары кыаллар усулуобуйаны тэрийэргэ кыһамньыларын уурдулар.
Киин куорат, Нерюнгри итиэннэ Серебряный Бор үөрэнээччилэриттэн таҥыллыбыт хоккей хамаандата тириэньэр Яков Кондаков (Дьокуускай) салалтатынан бэлэмнэнэр. Уолаттар бу ый 25-гэр Сахалиҥҥа тиийэн, салгыы дьарыктаныахтара.
Шорт-треккэ оҕолору Станислав Никитин, Прокопий Павлов, Владимир Коваленко эрчийэллэр. Саҥа дьыл аҕай иннинэ үс спортсмеммыт бастакы разряд нуорматын толорбута. Ону тириэньэрдэрэ улахан ситиһии быһыытынан сыаналыыллар. “Азия оҕолоругар” диэри хаалбыт кэмҥэ хаҥкыһыттар маастарыстыбаларын чочуйууга үлэлиэхтэрэ.
Фигурнай хаҥкылааһыҥҥа спортсменнарбытын Дарья Егорова уонна Елена Татаринова дьарыктыыллар. Бу күннэргэ оҕолор Екатеринбург куоракка эрчиллэллэр, дьарык тиһэх түһүмэҕин Дьокуускайга барыахтара.
Хайыһардьыттарбыт тириэньэрдэринээн Яков Поповтуун, Вячеслав Пономаренколыын, Альберт Сафаровтыын Сыктывкарга уонна Уфаҕа дьарыкка сылдьаллар.
Сноубордка уонна хайыһарынан хайаттан түһүүгэ Саха сирин чиэһин Оонньууларга сүрүннээн Нерюнгри уонна Мирнэй спортсменнара көмүскүөхтэрэ. Тириэньэрдэрэ Николай Гребенников (хайаттан түһүү), Екатерина Минакова (сноуборд) салалталарынан билигин Иркутскайга эрчиллэр-бэлэмнэнэр сборга сылдьаллар.
Оонньууларга тыҥааһыннаах күрэстэһии буолуоҕа сэрэйиллэр. Ол да буоллар, оҕолорбутугар эрэнэбит. Кэнники сылларга хоккеистарбыт, шорт-трекистэрбит Арассыыйа, Сибиир, Уһук Илин уокурук күрэхтэһиилэригэр кыайыылааҕынан тахсыталаабыттара онуоха төрүөт буолар.
Санатан эттэххэ, “Азия оҕолоро” норуоттар икки ардыларынааҕы бастакы кыһыҥҥы спортивнай оонньуулар Соҕуруу Сахалинскай куоракка олунньу 8—17 күннэригэр ыытыллыахтара.
Роман ПОПОВ, «Саха сирэ» хаһыат, edersaas.ru
Хаартыска интэриниэттэн ылылынна