Маны аах Успуорт

Саха сирин гимнасткаларын чаҕылхай ситиһиилэрэ

Художественнай гимнастикаҕа Уһук Илиҥҥэ бастыыр иһин күрэхтэһии Южно-Сахалинскайга тохсунньу 21 күнүгэр түмүктэннэ.
Күөн күрэс түмүгүнэн гимнасткалар Дарья Христофорова (СМК) уонна Ксения Медведева (1 спортивнай разряд) финалга киирдилэр. Спортсменка Зарина Борисова (СМК) 4 миэстэ буолла уонна Арассыыйаҕа бастыыр иһин күрэскэ кыттыахтаах Уһук Илин уокуругун сүүмэрдэммит хамаандатыгар киирдэ.
Саха сирин спортсменкаларын СӨ художественнай гимнастика Федерациятын бэрэсидьиэнэ Людмила Николаева эҕэрдэлээтэ: «Ис сүрэхпиттэн үөрэн туран оҕолору, кинилэр настаабынньыктарын, төрөппүттэри, федерациябытын ситиһиинэн эҕэрдэлиибин! Күөн күрэскэ өрө көтөҕүллэн бэлэмнэнии — ситиһиигэ сирдиир. Кыргыттар илин-кэлин түсүһэргэ чахчы бойобуой бэлэмнээхтэрин көрдөрдүлэр, кинилэр дьиҥнээх спортсменка буолалларын дакаастаатылар, мин онтон олус үөрэбин. Бу салгыы дьоһуннаахтык сайдарга эрэли саҕар! Арассыыйаҕа бастыыр иһин чөмпүйэнээккэ Саха сирин гимнасткаларыгар ис сүрэхпититтэн ыалдьыахпыт». 
Бэлиэтиир буоллахха, РФ СМК индивидуальнай бырагыраамаҕа бастыыр иһин күрэхтэһии олунньу 3-9 күннэригэр, бөлөҕүнэн толорууга — кулун тутар 3-7 күннэригэр ыытыллар. Арассыыйа чөмпүйэнээтэ бөлөҕүнэн толорууга күрэһэ тохсунньу 31 күнүттэн саҕаланар.
О.Кузакова 
0
0
Telegram @edersaas20