Бүгүн Дьокуускайга П.А.Ойуунускай аатынан Саха академическай тыйаатырыгар СӨ Фермер хаһаайыстыбаларын уонна тыа хаһаайыстыбатын кэпэрэтииптэрин ассоциацияларын “Аһынан-үөлүнэн хааччыйыы” (“Обеспечение продовольственной безопасности”) пуорума ыытылла турар. Пуорумҥа РФ Судаарыстыбаннай Дууматын Бэрэссэдээтэлин бастакы солбуйааччы, РФ АККОР-ун бэрэсидьиэнэ, РФ Судаарыстыбаннай Дууматын хас да ыҥырыылаах мунньахтарын дьокутаата Владимир Плотников, СӨ Бырабыыталыстыбатын Бэрэссэдээтэлин солбуйааччы Михаил Никифоров, Ил Түмэн тыа сирин уонна аграрнай бэлиитикэҕэ сис кэмитиэтин бэрэссэдээтэлэ, норуот дьокутаата Андрей Находкин, өрөспүүбүлүкэ тыатын хаһаайыстыбатын миниистирэ Александр Атласов, өрөспүүбүлүкэ фермердэрин ассоциациятын бэрэсидьиэнэ Александр Артемьев фермердэр хамсааһыннарын бэтэрээнэ И.Н.Федоров кытыннылар.
Пуорум өрөспүүбүлүкэ фермер хаһаайыстыбаларын уонна тыа хаһаайыстыбатын кэпэрэтииптэрин ассоциациятын 30-ус үбүлүөйдээх сылыгар ананна. РФ сенатора Егор Борисов аатыттан эҕэрдэ телеграмманы ааҕан иһитиннэрдилэр.
Бэйэтин эҕэрдэтин тиэрдэригэр Владимир Николаевич Плотников Саха сирин устуоруйатыгар бу тэрилтэ 30 сыл үлэлээн, судургута суох 90-с сыллартан үлэтин хорсуннук, сорунуулаахтык саҕалаабытын бэлиэтээтэ.
— Бүгүн аны оҕолор, сиэннэр аҕаларын, эһээлэрин саҕалаабыт үлэлэрин салгыыллар. Бэйэҕит сиргитигэр-уоккутугар, улуускут, өрөспүүбүлүкэҕит туһугар тыа хаһаайыстыбатын сайдыытыгар төһүү буолаҕыт, — диэн кини бэлиэтээтэ.
Уонна АККОР бочуотунай грамоталарын Екатерина Борисоваҕа (Мэҥэ Хаҥалас), Анатолий Бурнашовка (Уус Алдан), Александр Жирковка (Нам), Александр Корякиҥа (Хаҥалас), Дарья Поповаҕа (Таатта), Саргылана Соломоноваҕа (Хаҥалас), Александр Артемьевка туттарда. “Бочуоттаах фермер”, РФ Тыатын хаһаайыстыбатын министиэристибэтин махталын уонна да атын наҕараадалары бастыҥ фермердэр, кэпэрэтииптэр салайааччылара тутан, үөрдүлэр-көттүлэр. Онон Саха сирин фермер хаһаайыстыбаларын уонна тыа хаһаайыстыбатын кэпэрэтииптэрин ассоциациятын чилиэннэрин таһаарыылаах үлэлэрэ Арассыыйа уонна өрөспүүбүлүкэ таһымнарыгар бэлиэтэннэ.
СӨ Судаарыстыбаннай Мунньаҕын (Ил Түмэн) дьокутаата Андрей Находкин ыарахаттар баалларын үрдүнэн эдэр дьон тыа хаһаайыстыбатын бу хайысхатыгар ылсан үлэлииллэрин хайҕаата.
Тыа хаһаайыстыбата – бу көннөрү үлэ эрэ диир тутах, бу тыа сирин симэлийбэтин туһугар дьаһаныы. Бу пуорум саҕаланыан иннинэ эбиэккэ диэри Владимир Николаевич СӨ Судаарыстыбаннай Мунньаҕын (Ил Түмэн) Бэрэссэдээтэлэ Алексей Еремеевы кытта көрсөн, кэпсэттилэр. Өрөспүүбүлүкэбитигэр үбүлэнэр, үлэлиир 27 судаарыстыбаннай бырагырааматтан 13 млрд солкуобайы өрөспүүбүлүкэ бүддьүөтүттэн тыа хаһаайыстыбата ылар. Онон өрөспүүбүлүкэ салалтата, Судаарыстыбаннай Мунньаҕа тыа хаһаайыстыбатын өйүүр. Онон иккис тыын ыламмыт олохтоох бородууксуйабытын ылыыга күүскэ үлэлиэҕиҥ диэн ыҥырда А.М.Находкин.
СӨ тыатын хаһаайыстыбатын миниистирэ Александр Атласов бэйэтин тыл этиитигэр АККОР Саха сиригэр хайдах 30 сыл анараа өттүгэр тэриллибит устуоруйатын кэпсээтэ, быһата, устуоруйа аанын сэгэттэ. Ол курдук, өрөспүүбүлүкэҕэ бастакы фермер хаһаайыстыбалара 1987 с. тэриллибиттэр уонна 1989 с. ахсынньы ыйга дьиэ кэргэн фермер хаһаайыстыбаларын тэрийэр кэмпириэнсийэлэрэ ыытыллыбыт.
Салгыы “Саха сирин фермердэрэ – хоту сир тумус туттар дьоно” (“Фермеры Якутии – соль земли северной”) дакылааты өрөспүүбүлүкэ фермер хаһаайыстыбаларын уонна тыа хаһаайыстыбатын кэпэрэтииптэрин ассоциацияларын бэрэсидьиэнэ Александр Еремеевич Артемьев дакылааттыаҕа. Бу салааҕа быһаччы үлэлии сылдьааччылар тыл этиилэрин кэннэ “Саха сирин фермердэрэ ыллыыллар” кэнсиэрэ көрөөччүлэри — пуорум кыттыылаахтарын сэргэхситиэҕэ.
Пуорум бэлиэ түгэнинэн “Якутскому фермерству 30 лет” диэн кинигэ-альбом күн сирин көрбүтэ буолар. Бу альбому арыйдахха биһиги хоһуун үлэһит фермердэрбит үлэлэрэ-хамнастара, ситиһиилэрэ барыта ырылыччы кэпсэнэр.
Бэлэмнээтэ Женни Стрюкова
Хаартыска: ааптар