Саха сирин экологияҕа министиэристибэтэ: Амманы кыйа харыстанар ойуурга мас кэрдиэхтэрэ суоҕа
Саха сирин экологияҕа министиэристибэтэ: Амманы кыйа харыстанар ойуурга мас кэрдиэхтэрэ суоҕа.
Социальнай тиһиктэринэн уонна whatsapp мессенджеринэн Амма өрүс үөһээ өттүгэр ойууру кэрдиигэ сөбүлэһэр түмүк кэлбит диэн иһитиннэрии тарҕанар. Саха сирин Экологияҕа министиэристибэтэ иһитиннэрэринэн, “Ангара” уонна “Вудленд” хааччахтаммыт тэрилтэлэр 2019 сыл ахсынньы 30 күнүгэр ыытыллыбыт аукцион түмүгүнэн ойуур учаастагын түүлэһии дуогабарын түһэрсибиттэр. Салгыы, дуогабар усулуобуйатыгар олоҕуран, бу тэрилтэлэр Ойууру баһылааһын бырайыактарын толорон судаарыстыба эспэртиисэтигэр (чинчийии) биэрбиттэр. Маны көрүүгэ сэдэх уонна сүтэр кутталлаах мас, талах көрүҥнэри уонна да атын үүнээйилэр тустарынан сибидиэнньэ ыйыллыбатаҕа, кыһыл кинигэҕэ киирбит кыыллар тустарынан чахчылар суохтара, сиппит ойууру барытын кэрдиигэ кэрдиллэр ойуур иэнин чахчыларыгар сыыһалар уо.д.а. кэһиилэр бааллара биллибит. Судаарыстыба эспэртиисэтэ сөбүлэспэт (отрицательнай) түмүгү биэрбитэ. Бу сөбүлэспэт түмүккэ “Эйгэ” Саха Өрөспүүбүлүкэтин экологияны сырдатыыга киинэ” уопсастыбаннай тэрилтэ чинчийбит түмүгүн болҕомтоҕо ыларга этиллибитэ.
Ойууру баһылааһын бырайыактарын хаттаан көрүүгэ уонна чинчийиигэ биллибитинэн, уопсастыбанньыктар бары бэлиэтээһиннэрэ бырайыагы ситэриигэ болҕомтоҕо ылыллыбыт, биллэн турар, сокуоннас чэрчитинэн. Оттон бу, бастатан туран, Арассыыйа Федерациятын Ойуурга кодексата, бу докумуон ойууру баһылааһын бырайыактарын көрөр, ону тэҥэ “Ойууру баһылааһын бырайыагын састаабын уонна итини оҥоруу бэрээдэгин бигэргэтэр туһунан” Арассыыйа Ойуурга хаһаайыстыбатын 2012 сыллааҕы бирикээһигэр олоҕуран бу докумуон толоруллуохтаах уонна судаарыстыба эспэртиисэтэ (чинчийиитэ) докумуоннары ойуур сокуонугар сөп түбэһиитин көрөр.
Айылҕа харыстабылын борокуратууратын бэрэбиэркэтигэр, ону тэҥэ бу тэрилтэ ыҥырыытынан үлэлээбит Монополияны утары федеральнай сулууспа исписэлиистэрин бэрэбиэркэлээһиннэринэн аукциону ыытыыга кэһии булуллубатах. Тоҕо диэтэххэ, көннөрүүлэри киллэрбит этилэр, онон аккаастыырга төрүөт суоҕа.
Уопсастыбанньыктар туруорсууларынан “Ангара” ХЭТ кэрдии былаанын Амманы кыйа харыстанар ойуурдарга эмиэ уларыппыта, үрэхтэри уонна үрүйэлэри кыйа сытар ойуурдарга маһы кэрдии олох ыытыллыа суоҕа, бырайыактан таһаарбыттар.
Маны сэргэ бу учаастактар кэтээн көрөр уорганнар уонна уопсастыбаннай экологтар өттүлэриттэн мэлдьи ураты хонтуруолга тутуллуохтара.
Маһы соҕотуопкалааһыҥҥа кэрдии технологиятын тутустахтарына, ойуур хаһаайыстыбатыгар буортулааһын уонна хоромньу оҥоһуллуо суоҕа.
Экологияҕа, ойууру туһаныыга уонна ойуур хаһаайыстыбатыгар миниистири солбуйааччы, өрөспүүбүлүкэ кылаабынай лесничэйэ Алексей Агеев бэлиэтииринэн, түүлэһии дуогабарын көтүрүүгэ суут уурааҕа эрэ төрүт буолуон сөп. Билиҥҥи туругунан ким да суукка дьыала түһэрэ илик.
Бэлэмнээтэ Женни СТРЮКОВА
Хаартыска: интэриниэттэн