Майя Данилова: “Сиртэн хостонор баайы атыылыыр буоламмыт кириисис арыый халымардык дьайыа”

Саха сирин экэниэмикэтин миниистрэ Майя Данилова “Якутия24” теле-ханаалга Саха сирин экэниэмикэтэ дойдубутун утары ылыллыбыт санкциялар усулуобуйаларыгар хайдах былааннааҕын туһунан кэпсэттэ. Ол курдук кини кириисис кэмигэр саҥа кыахтар үөскүүллэрин, сыана үрдүүрүн утары охсуһуу хайдах барарын билиһиннэрдэ. Майя Данилова этэринэн, Саха сирин экэнэмиэкэтэ биир үксүн сир баайын хостуурга олоҕурбутун иһин, кириисис охсуута арыый халымар буолуоҕа:

—  Билигин Саха сирин бырамыысылыннаһын бары тэрилтэлэрэ атын дойдулартан киллэрэр тиэхиньикэлэрин учуоттаан, үп сүүрээннэрэ тосту уларыйбыттарын ааҕан туран, үлэлэрин саҥалыы cүрүннээн эрэллэр. Ол кэнниттэн өр кэмнээх былааны оҥоруохха сөп. Билигин уһун кэмҥэ дириҥ былаан, барыл оҥорор ыарахаттардаах. Балаһыанньабыт күн-түүн аайы уларыйа турар. Хата, Уһук Илин эрэгийиэнигэр киирбит инвестициялар, өр кэмҥэ түһэрсиллибит хантараактар үгүстэрэ Азия дойдуларын кытта. Онон бу өттүттэн биһиги, кырдьык, арыый «барыстаах» хааллыбыт диэххэ сөп.

Нэһилиэнньэҕэ санкциялар дьайыылара күннээҕи табаардар сыаналара үрдээһинигэр көстөр. Сыана үрдээһинин утары Арассыыйа уонна Саха Өрөспүүбүлүкэтин салалтата күүстээх үлэни саҕалаата. Холобура, Саха сирин бырабыыталыстыбата кууһунан табаары тиэйиинэн дьарыктанар чааһынай уонна судаарыстыбыннай тэрилтэлэри өйүүргэ кэккэ миэрэлэри ылыныаҕа. Биллэн турар, атыы инники кирбиитигэр турар урбаан орто уонна алын тэрилтэлэрин өйүүр туһугар туспа дьаһаллар эмиэ ылыныллыахтара.

Аны туран Саха сиригэр табаары, аһы-үөлү эрдэттэн атыылаһарбыт иһин саппаастаахпыт. Бырабыыталыстыба кууһунан атыылыыр урбаанньыттары өйүүр туһугар нолуогу ставкатын саамай кыра таһымҥа (1%) тиийэ түһэрэри былаанныыр эбит. Аны атыы-эргиэн тэрилтэлэрэ харчылаах буоллуннар диэн Араассыыйа бааннарын кирэдииттэри бырыһыанын 13,5 бырыһыаҥҥа диэри аччаппыттар. Манна эбии Саха Өрөспүүбүлүкэтэ субсидия көрөн дьиҥнээх кирэдиит ставкатын 8 бырыһыан оҥорору былаанныыр.

Салгыы Майя Данилова IT секторын туһунан санаатын үллэһиннэ. Кини этэринэн, InDriver уонна MyTona хампаанньалара Саха сириттэн баран эрэллэрэ хомолтолоох. «Ол эрэн кинилэртэн киирбит дохуот сир баайын хостуур тэрилтэлэри кытта тэҥнэммэт кыра. Түргэн туттунуулаах хампаанньалар төннөллөрө эмиэ ити курдук түргэн буоларын өйдүөх тустаахпыт. Итини туох эрэ улахан иэдээн, көммөт үлүгэр курдук сыаналыыр сыыһа», — диэтэ кини.

Сиһилии быһа холбунуу суруллубут ролигын арыйан көрүөххүтүн сөп.

«Саха сирэ» хаһыат, edersaas.ru

Хаартыска Ютубтан скриншот