Саха сирин дэлэгээссийэтэ “Арктика талааннара. Оҕолор” бырайыакка кыттар
Саха сирин дэлэгээссийэтэ “Арктика талааннара. Оҕолор” бырайыакка кыттар.
Балаҕан ыйын 7 күнүгэр диэри Калуга уобалаһыгар “Этномир”этнография паарка-мусуойугар “МЫ-Россия” култуурунай-үөрэтэр бырайыак ыытыллыаҕа.
Бырайыагы Арассыыйа Федерациятын Национальностар дьыалаларыгар федеральнай агентствота олоххо киллэрэр.
Бырайыак көмөтүнэн оҕолор Арассыыйа элбэх омуктаах норуоттарын үгэстэрин уонна култуураларын билиэхтэрэ. Ону сэргэ патриоттуу иитиигэ, тыллары үөрэтиигэ, географияҕа анаммыт бырагыраамаҕа кыттыахтара.
Бырайыакка Красноярскай кыраай, Калуга, Мурманскай, Новгородскай, Нижегородскай, Архангельскай уобаластар, Ненецкэй, Ханты-Мансийскай автономнай уокуруктар, Коми, Калмыкия, Карелия, Карачаево-Черкессия уонна Саха сирэ кыттарга сайаапка түһэрбиттэрэ.
“Арктика талааннара, Оҕолор” бырагыраамаҕа Саха өрөспүүбүлүкэтиттэн Хоту дойду аҕыйах ахсааннаах төрүт норуоттарын биэс оҕото кыттар:
— Уйгуяна Горохова, Усуйаана
— Максим Кейметинов, Кэбээйи
— Ганна Степанова, Алдан
— Аниврин Алексеев, Кэбээйи
— Айаана Туприна, Анаабыр
Бөлөх салайааччыта, А.Е.Кулаковскай аатынан Норуоттар доҕордоһууларын дьиэтин методиһа Анастасия Куличкина маннык кэпсээтэ: “Арыллыы сиэригэр-туомугар биһиги оҕолорбут долган, дьүкээгир уонна эбээн үҥкүүтүн толоруохтара уонна ыллыахтара. Бу элбэх омук кыттар бырайыагар өрөспүүбүлүкэбит аатын-суолун үрдэтэрбититтэн киэн туттабыт. Бырайыак чэрчитинэн оҕолор үгүһү билиэхтэрэ”.
Сахаговтан
Бэлэмнээтэ Женни Стрюкова
Хаартыска: тустаах саайтан