Саха сирин дьахталларын эһиил икки суолталаах тэрээһин күүтэр...
Олох-дьаһах

Саха сирин дьахталларын эһиил икки суолталаах тэрээһин күүтэр

СӨ Аҕа баһылыгын уонна Бырабыыталыстыба дьаһалтатын салайааччы Афанасий Владимиров видеосибээһинэн Саха сирин дьахталларын ХV сийиэһин уонна Уһук Илин дьахталларын II пуорумун ыытыы туһунан бастакы тэрээһин мунньаҕы ыытта.

edersaas.ru

Суолталаах тэрээһиннэр эһиил, 2021 сылга, Дьокуускайга ыытыллыахтара. Саха дьахталларын 1-кы сийиэһэ 1925 сыллаахха тэриллибитэ. Онно үөрэхтээһин, ийэ уонна оҕо доруобуйатын боппуруостара дьүүлгэ туруоруллубуттара. Бу историческай хамсааһын дьахтар уопсастыбаҕа оруолун үрдүктүк көтөхпүтэ.

Уһук Илин уокуругун дьахталларын I пуорума 2019 с. Чита куоракка ыытыллыбыта. Арассыыйа дьахталларын сойууһун бэрэссэдээтэлэ, Федерация Сэбиэтин чилиэнэ Екатерина Лахова көҕүлээһининэн пуорум кыттыылаахтара маннык тэрээһини икки сыл буола-буола ыытар туһунан быһаарыы ылыммыттара. Саха сирин дэлэгээссийэтэ тэрээһини Дьокуускайга ыытарга этии киллэрбитэ.  СӨ Бырабыыталыстыбатын 2020 с. алтынньы 7  күнүнээҕи 913-р №-дээх дьаһалынан  Саха сирин дьахталларын XV сийиэһин уонна Уһук Илин уокуругун дьахталларын II пуорумун 2021 сыл алтынньыга ыытарга быһаарыллыбыта.   2025 сылга Саха сирин дьахталларын сийиэһэ ыытыллыбыта 100 сылын көрсө ыытыллар пуорум Арассыыйатааҕы суолталаах. Онон маннык улахан тэрээһиннэри ыытыыга туһуламмыт былаан сэтинньи  23 күнүгэр диэри Ил Дархан уонна Бырабыытылыстыба дьаһалтатыгар бигэргэтиигэ киирэригэр сорудахтанна. Ыччат уонна социальнай коммуникация миниистирэ Степан Саргыдаев эһиилги тэрээһини Саха сиригэр Ийэ күнүн бэлиэтээһиҥҥэ түбэһиннэрэн,  тэрээһиннэри алтынньы 11-15 күннэригэр ыытарга диэн болдьоҕу чопчулаата. Куйаар ситиминэн ыытыллыбыт мунньах кыттааччылара суолталаах тэрээһиннэри ыытыыга бэйэлэрин санааларын тиэртилэр.

Елена ПОТОЦКАЯ, «Саха сирэ» хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

18 − 8 =