Коронавирус дьаҥа арыый хаптайа быһыытыйбытын кэнниттэн чир успуорт көрүҥэр бастакы күрэхтэһии муус устар 17 күнүгэр буолла. Ол курдук Fest life диэн араас саастаах дьоҥҥо анаммыт бэстибээл-куонкурус чэрчитинэн “Кыайыы 50 сыла” успуорт дыбарыаһыгар Дьокуускайтан, Горнайтан уонна Нерюнгриттэн уопсайа 80 спортсмен күөн көрүстэ.
Кыра оҕолорго «Чир-фристайл” көрүҥҥэ хамаанданан кыттыыга Горнай улууһун Сардаана оҕо уһуйаанын иитиллээччилэрэ бастакы миэстэҕэ тигистилэр. Тириэнньэрдэр С.И.Яковлева уонна С.А.Васильева, иккис миэстэни Дьокуускайтан «Snow white” диэн А.В Черкашина тириэнньэрдээх бөлөх ылла.
Юниордарга норуоттар икки ардыларынааҕы арктическай оскуола “Starfit “ хамаандата кыргыттарга кыайда (тириэнньэр Л.П.Дмитриева). Ону сэргэ Горнай Бэрдьигэстээҕин “Кырсаада” бөлөҕө”чир-фристайл” уонна “чир хип-хоп” көрүҥнэргэ тэҥнээхтэрин булбатылар (тириэнньэр Т.И.Терентьева). Бу көрүҥҥэ Нерюнгри куорат “GhheerNRG” хамаандата уонна “Галатея” хамаандалара бастыҥынан ааттаннылар.
Саха сирин чирлидинг көрүҥэр федерация салайааччытын солбуйааччы Алина Черкашина:
— Саха сиригэр чир успуорт көрүҥэ тэтимнээхтик 2015 сылтан сайдар. Бу успуорт көрүҥэ гимнастиканы, успуорт үҥкүүтүн уонна фитнеһи холбообут кэриэтэ. Федерация төрүттэниэҕиттэн бу көрүҥүнэн дьарыктанар дьон ахсаана сыыйа элбээбитэ. Өрөспүүбүүкэтээҕи успуорт бэстибээлигэр кэлбит спортсменнар 11 көрүҥҥэ кытыннылар. Төһө да пандемия кэмигэр дьарыктар онлайн ыытыллыбыттарын иһин, спортсменнар үчүгэй түмүгү көрдөрдүлэр. Кыайыылаахтар бу ыам ыйын 6-8 күннэригэр Москуба куоракка бүтүн Арассыыйатааҕы күрэхтэһиигэ кыттыахтара.
Анжелика Ширяева, 17 саастаах, успуорт маастарыгар хандьыдаат. Өрөспүүбүлүкэ уонна Арассыыйа күрэхтэһиилэрин чөмпүйүөнэ, Дьокуускай куорат:
— Мин бу көрүҥүнэн уон биир сааспыттан дьарыктанабын. 2018 сыллаахха олунньуга Москва куоракка Арассыыйа чемпионатыгар хамаанданан 1 миэстэни ылары ситиспиппит уонна 16 кыыс онно успуорт маастарыгар хандьыдаат буолары ситиспиппит. Москва, Казань, Сочи, Екатеринбург куораттарга ыытыллыбыт күрэхтэһиилэргэ кыттан миэстэлэспиппит. Хас биирдии ситиһии, кыайыы дьаныардаах үлэттэн тахсар. Пандемия бүтэн дьарыктарбыт саҕаламмыттарыттан үөрэбит. Пандемия кэнниттэн ыытыллыбыт бастакы күрэхтэһиигэ мин соҕотох уонна пааранан кыттыыга бастаатым. Түгэнинэн туһанан тириэнньэрдэрбэр А.В.Черкашинаҕа, Н.И.Индеевка уонна В.Кычкиҥҥа махталбын тиэрдэбин.
Ульяна ЗАХАРОВА.
Күрэхтэһиини тэрийээччилэр тус архыыптарын хаартыскалара туһанылыннылар.