Санкт-Петербург куоракка алтынньы 4-8 күннэригэр аан дойдутааҕы Х ньиэп уонна гаас форума буола турар.
Бүгүн форум бырагырааматын чэрчитинэн, «Сахатранснефтегаз» АУо, Air Liquide Global E&C Solutions уонна «СӨ инвестицияны тардыыга уонна тас таһаарыыны өйүүр» ГБУ Отраднинскайдааҕы гаас баайдаах сири туһаҕа таһаарыыга бииргэ үлэлииргэ Сөбүлэһиини түһэристилэр. Тустаах докумуоҥҥа «Сахатранснефтегаз» АУо генеральнай дириэктэрэ Алексей Колодезников уонна Air Liquide Global E&C Solutions генеральнай дириэктэрэ Евгений Чернов илии баттаатылар. Air Liquide Global E&C Solutions хампаанньа аан дойду таһымнаах тэрилтэнэн буолар, бырайыактааһыҥҥа, оҥорон таһаарыыга туһаныллар оборудованиелары оҥорууга, таҥан туруорууга бастыҥнар кэккэлэригэр сылдьар. Дуогабар быһыытынан Air Liquide диэн анал оборудование Ленскэй оройуонугар турдаҕына, онно хостонуллар гааска азот булкадаһыга лаппа аҕыйах буолара ситиһиллиэҕэ. Бу Отраднинскайдааҕы гаас хаачыстыбатын тупсарыаҕа уонна ол «Сибиир күүһэ» магистральнай утаҕынан барар гаас таһымыгар эппиэттиир буолуоҕа. Отраднинскайдааҕы сир баайдаах учаастакка 100 млрд. куб гаас саппааһа баар. Бу учаастак туһаҕа таҕыстаҕына, Алданнааҕы гааһы үллэрэр ыстаансыйа кыамтата улаатан, Алдан бырамыысыланнаһын кластерын тэрилтэлэрэ «күөх төлөнү» туһанар кээмэйдэрэ үрдүөҕэ. Итини тэҥэ, Ленскэй, Өлүөхүмэ, Алдан уонна Нерюнгри улуустарын гааһынан хааччыйыыга төһүү күүһүнэн буолуоҕа.
Иккис үтүө түгэнинэн Мэҥэ Хаҥалас улууһун Аллараа Бэстээх бөһүөлэгэр ыгыылаах гааһы (СПГ) оҥорорго аналлаах бырайыагы олоххо киллэриигэ бигэ акылаат түһэрилиннэ. Бырайыагы олоххо киллэрэр инниттэн «Сахатранснефтегаз» АУо, Sirius Holding Group Limited, «Туймааданефтегаз» АУо уонна «СӨ инвестицияны тардыыга уонна тас таһаарыыны өйүүр» ГБУ бииргэ үлэлииргэ Сөбүлэһиигэ илии баттастылар. Бу бырайыакка олохтоох хампаанньа «Сахатранснефтегаз» АУо гааһы тиэрдиини толоруоҕа.
Форум туһунан
Тэрээһин устуоруйатын кыратык сэгэтэн көрөр буоллахха, 2011 сылтан ыыталлар. Гаас уона ньиэп индустриятыгар аан дойду таһымнаах тэрилтэлэр салайааччылара, бэрэстэбиитэллэрэ кытталлар. Быйылгы форум 10-с төгүлүн ыыталларынан үбүлүөйдээх тэрээһининэн буолар.
Форум кыттааччылара гаас салаатыгар туһаныллар саҥа оборудованиелары анаан-минээн аҕалан көрдөрөллөр. Уопсайынан, Арассыыйаҕа гаас бырамыысыланнаһын сайыннарыы боппуруостарыттан саҕалаан, аан дойдутааҕы гаас бырамыысыланнаһын сайдыытыгар туох саҥа саҕахтар, саҥа саҕалааһыннар баалларын туһунан кэпсэтии барар. Итилэри илдьиритэн быһаарсар инниттэн 90-тан тахса араас тэрээһиннэр ыытыллаллар. Форумҥа гаас бырамыысыланнаһын бары салаатыттан эспиэрдэр, тас дойдулартан – Италияттан, Германияттан, Францияттан, Австрияттан, Словакияттан, Чехияттан, Боливияттан, Нигерия өрөспүүбүлүкэтиттэн тиийэ кытталлар, санааларын атастаһаллар, уопуттарын үллэстэллэр.