СӨ Доруобуйа харыстабылын министиэристибэтин сүнньүнэн, өрөспүүбүлүкэттэн быраастар бөлөхтөрө тэриллэн, Москва клиникаларыгар тиийэн хоруона хамсыгын эмтииргэ эбии үөрэнэллэр.
Москва быраастара пандемия кэмигэр пациеҥҥа мэдиссиинэ көмөтүн оҥорууга үөрүйэхтэрин кэллиэгэлэрин кытары үллэстэллэр диэн СӨ Доруобуйа харыстабылын министиэристибэтин пресс-сулууспата иһитиннэрэр. Ол курдук, сүрүн сыал-сорук ковид ыарыһахтары эмтээһиҥҥэ инфекционнай отделениелар үлэлэрин сиһилии билиигэ-көрүүгэ, эмтээһиҥҥэ ууруллубут. Маныаха Москваҕа доруобуйа харыстабылын департамена бэлэмнээбит бырагырааматынан быраастар «Крылатское» муус дыбарыаска быстах кэмҥэ тэриллибит госпитальга — куорат балыыһатын 67 филиалыгар, Склифосовскай институтугар, 52 №-дээх куорат балыыһатыгар, Коммунаркаҕа инфекционнай балыыһаҕа, хас биирдиилэригэр үстүү күн сылдьаллар.
Бэлиэтээбиттэринэн, стажировкаҕа реаниматолог-анестезиолог Анна Домокош уонна пульмонолог Татьяна Барашкова (өрөспүүбүлүкэтээҕи килиниичэскэй балыыһаттан), Мэҥэ Хаҥаластан улуустааҕы киин балыыһа терапева Юлия Кулаковская, Чурапчыттан улуустааҕы киин балыыһа реаниматолог-анестезиолог бырааһа Виктор Потапов уонна Мииринэй оройуонун киин балыыһатын реаниматолог-анестезиолог бырааһа Эркин Кангелдиев барбыттар.
«Пандемия саҕаланыаҕыттан ковидынан ыалдьыбыт дьону эмтээһиҥҥэ ылсыбыппыт. Биһиги отделениебытыгар ыарахан уонна адьас ыарахан туруктаах пациеннар сыталлар. Үлэм сүнньүнэн үөрүйэҕи атастаһарым, эбии үөрэнэрим олус наада. Ыарыһахтары аан бастакыттан, балыыһаҕа ыарыһахтар хосторуттан интенсивнэй терапияҕа тиийэ эмтииргэ, көрүүгэ-истиигэ тактика туһунан быраастар кэпсээтилэр», — диэн анестезиолог-реаниматолог Анна Домокош санаатын үллэстибит. Салгыы: «Хас биирдии быраас Н.В.Склифосовскай аатынан суһал көмөнү оҥорор научнай-чинчийэр институкка сылдьан үлэни-хамнаһы сиһилии көрүөн, билиэн баҕарар буолуохтаах. Биһиги манна лабораторнай диагностиканы, доруобуйаны чинчийиини көрдүбүт, covid-ыарыһахтар инфекционнай блоктарыгар сырыттыбыт. Манна барытын ымпыгар-чымпыгар тиийэ сиһилии быһааран, көрдөрөн кэпсээтилэр. Иккис күн covid-ыарыһахтар инфекционнай блоктарыгар сырыттыбыт. Пациеннар лабораторнай дааннайдарын, чинчийиилэри, эмтээһиннэри сиһилии билистибит. Үлэбитинэн элбэх наадалааҕы, туһалааҕы биллибит», — диэн эбэн эппит.
+1
+1
+1
+1
+1
+1
+1