Доруобуйа Маны аах

Саха сирин быраастара “Коммунаркаҕа” стажировкаланнылар

Аатырбыт “Коммунарка” — бу Арассыыйаҕа “ковидтаах” ыарыһахтары эмтиир саамай улахан инфекционнай госпиталь буолар. Манна Саха сирин быраастара тиийэн, үс күннээх стажировкаҕа үөрэннилэр.

Стажировканы СӨ доруобуйаҕа харыстабылын министиэристибэтэ тэрийдэ. Өрөспүүбүлүкэтээҕи килиниичэскэй балыыһаттан, Дьокуускайдааҕы мэдиссиинэ кииниттэн, 2-с уонна 3-с №-дээх куораттааҕы балыыһалартан, 3-с №-дээх өрөспүүбүлүкэтээҕи килиниичэскэй балыыһаттан, Нерюнгритээҕи киин балыыһаттан 9 быраас баран үөрэннилэр.

— Балыыһа онкологическай кииҥҥэ ананан тутуллубут эрээри, пандемия саҕаланыаҕыттан инфекционнай госпитальга кубулуппуттар. Ону тэҥэ, кэлин өссө ньиэмэстэр технологияларынан тыһыынчаттан тахса куойкалаах быстах госпиталлары тэрийбиттэр. Онон киэҥэ-куоҥа сүрдээх, киһи сөҕөр эрэ. Маннык улахан госпитальга үлэ тэрээһинин билсэр олус интэриэһинэй. Биһиги икки күн быраастары кытары тэҥҥэ үлэлээтибит. Дойду үрдүнэн коронавируснай инфекцияны эмтээһин министиэристибэ олохтообут биир схематынан ыытыллар. Онон биһиги эмтиир ньымаларбытыттан улахан уратыта суохтар. Ол эрээри, хас биирдии балыыһаҕа үлэ хаамыытын тэрийии уратылардаах буолар. Биһиги саҥа ньымаларга эмиэ үөрэннибит. “Коммунаркаҕа” кураанах турар куойкалар бааллар этэ эрээри, ону ким да сабар, кыччатар былаана суох. Тоҕо диэтэр, аны саас коронавирус саҥа долгуна кэлиэ диэн сабаҕалыллар. Онон биһиги эмиэ онно бэлэмнээх буолуохтаахпыт, уоскуйарга өссө да эрдэ, — диэн 3-с №-дээх Өрөспүүбүлүкэтээҕи килиниичэскэй балыыһа гериатрическай киинин реанимацияҕа салаатын сэбиэдиссэйэ Акулина Федотова кэпсээтэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20