Швеция Хальмстад куоратыгар юниордарга (23-гэр диэри саастаахтарга) пауэрлифтиҥҥа аан дойду чөмпүйэнээтэ балаҕан ыйын 23 күнүттэн алтынньы 3 күнүгэр диэри ыытыллар. Онон билигин да буола турар.
Бу күрэхтэһиигэ Үөһээ Бүлүүттэн төрүттээх, Арассыыйа рекордсмена Богдан Прокопьев 120 киилэттэн үрдүкү ыйааһыннаахтарга киирсэн, үһүс миэстэ буолары ситистэ. Барыта түөрт мэтээли ылла. Олорон баран турууга 345 киилэни көтөҕөн, иккис миэстэни ылан, үрүҥ көмүс мэтээли иилиннэ. Итини тэҥэ, сытааран анньыыга 205 киилэни уонна становой анньыыга 310 киилэни ылан, боруонса мэтээллэри кэттэ. Онон үс көрдөрүүтэ 860 киилэҕэ тэҥнэһэн, үһүс миэстэ буолары ситистэ, бу куһаҕана суох көрдөрүү.
Богдан Прокопьевтыын суотабайыгар эрийэн кэпсэтэрбэр, хайыы-үйэ Москваҕа кэлбит этэ. «Күрэхтэһии билигин да буола турар. Мин ыйааһыммар күрэхтэһии этэҥҥэ ааста. 3 күн буола-буола пцр-анаалыс туттарбыппыт. Спортсмен күрэхтэһэн бүттэ да, тута өтөҕүн быһар. Айана уһуна бэрт эбит, поеһынан айаннаатым үксүн, күнүм-дьылым онно барда. Астара мөлтөх, эти сиэбэт эбиттэр. Ол иһин, ыйааһыным түһэн, үчүгэйдик киирсибэтим. Становой анньыыга 332.5 киилэни анньан көрдүм эрээри, тарбахтарым туппакка, бочуоттаах иккис миэстэни мүччү туттум. Кыһыйан да, хайыахпыный?
Өссө күүскэ дьарыктанар санаалаахпын. Уопсайынан, күрэхтэһиигэ дьарык кэмигэр тардыбыт, анньыбыт ыйааһыҥҥынааҕар элбэҕи оҥорорго дьулуһуулаах буолан, олус умсугутуулаах, интэриэһинэй. Күрэхтэһээччилэр таһымнара үрдүк буолан, уопут, үөрүйэх ыларга бэрт чөмпүйэнээт буолла. Ордук Италия уонна Грузия күрэхтэһээччилэрин кытта күүскэ ылсан кииристибит. Швецияҕа барыам иннинэ Архангельскай куоракка тириэньэрбэр Антон Солодовка биир ый дьарыктаммытым. Бу чөмпүйэнээккэ Арассыыйа сүүмэрдэммит хамаандата юниордарга 1 миэстэ буолары ситистэ, бу дьоһун көрдөрүү», — диэн Саха сирин бухатыыра Богдан кэпсээтэ.
edersaas.ru