Сүрүн Уопсастыба

Саха сирин биир саамай уустук суоллаах-иистээх сэлиэнньэтигэр оҕуруот аһа уонна фрукта тиэрдилиннэ

Саха сирин биир саамай уустук суоллаах-иистээх сэлиэнньэтигэр Саҥа дьылы көрсө оҕуруот аһа уонна фрукта тиэрдилиннэ. 

Аллараа Халыма оройуонун Андрюшкино сэлиэнньэтигэр ааспыт нэдиэлэҕэ Ми-26 таһаҕас тиэйэр улахан бөртөлүөтүнэн 15 туонна кэриҥэ аһы-үөлү уонна ОДьКХ, доруобуйа харыстабылыгар уонна үөрэххэ наадалаах таһаҕас тиэрдилиннэ. Маны тиэрдиигэ «Базовые металлы» диэн оройуон сиригэр уонна Чукоткаҕа үлэлиир хампаанньа көмөлөстө.
Сэлиэнньэ баһылыга Сергей Третьяков иһитиннэрбитинэн, «Якутопторг» сайаапка түһэриллиэҕиттэн үс күн иһигэр быһаарыллан, таһаҕас бөртөлүөтүнэн Орто Халыматтан сэтинньи 24 күнүгэр аҕалыллыбыт.
«Якутоптторг» Дьокуускайтан Орто Халымаҕа «Полярные авиалинии» Ан-26 самолетунан сэтинньи 23 күнүгэр оҕуруот аһын уонна фруктаны, ону таһынан, халбаһыыны, үрүҥ аһы аҕалбыттар. Онно куруппалары, мкароннары, сгущенкалары эппиттэр. Сарсыҥҥытыгар Черскэйтэн Ми-26 бөртөлүөт ОДьКХ, оскуолаҕа уонна балыыһаҕа наадалаах таһаҕаһы тиэйэн көппүт. Бөртөлүөт Орто Халымаҕа түһэн аһы-үөлү эбии тиэммит уонна аҕыйах чааһынан Андрюшкиноҕа аҕалбыта«, — диир сэлиэнньэ баһылыга.
 Саҥа дьыл чугаһыгар «Якутоптторгтан» Орто Халымаҕа өссө биир рейс былааннанар. Андрюшкино баһылыга бэлиэтээбитинэн, онуоха диэри кыһыҥҥы суол аһыллар, оччоҕуна таһаҕаһы массыынанан да аҕалыахха сөп буолар.
«Арктикаҕа сыананы тутар уонна олохтоохтору сибиэһэй аһынан хааччыйа турар туһуттан, арктическай оройуоннарга оҕуруот аһын хаһаанар анал сирдээх эргиэн-логистика кииннэрин тутабыт. Аныгыскы сылга маннык киин Аллараа Халымаҕа үлэлиэхтээх«, — диир СӨ Ил Дархана Айсен Николаев.
Санатан эттэххэ, арктическай оройуоннарга ас-үөл сыанатын үрдэппэт туһуттан, СӨ Ил Дархан сорудаҕынан «Якутопторг» эргиэн-логистика кииннэрэ тэриллэллэр. Саахар сыаната 86,5 солк., 21%-нан чэпчэки, хортуоппуй 74 солк. (-26%), үүт 80 солк., (-54%) уонна яблоко киилэтэ 277 солк. (-41%).
Быйыл маннык кииннэр Абый уонна Усуйаана оройуоннарыгар аһыллыбыттара. 2022 сылга эргиэн-логистика кииннэрэ Дьааҥыга, Орто Халымаҕа уонна Аллараа Халымаҕа былааннаналлар.
Биһиги корр.
0
0