Саха сирин бастыҥ таксиһын талыахтара

Ааптар: 
Бөлөххө киир:

Саха сирин бастыҥ таксиһын ыстакааннаах уунан быһаарыахтара.

Дьокуускайга атырдьах ыйын 4 күнүгэр «Лучший водитель такси в России – 2022» диэн Арассыыйатааҕы күрэхтэһии эрэгийиэннээҕи түһүмэҕэ ыытыллыа. Такси суоппардара 15 000, 10 000 уонна 5 000 солк. харчынан бириэмийэни ылар иһин илин-кэлин түсүһүөхтэрэ. Кыайыылаах өрөспүүбүлүкэ аатыттан федеральнай күрэхтэһиигэ кыттыаҕа. Тэрээһин СӨ Тырааныспар уонна суол хаһаайыстыбатын министиэристибэтин өйөбүлүнэн ыытыллар. Кыттыан баҕалаахтар https://russia-driver.taxi/#participate сайаапкаҕытын биэрэҕит.

Санатан эттэххэ, 2021 сыллаахха түмүктүүр күрэхтэһии Чечня Өрөспүүбүлүкэтигэр буолбута. Тэрээһиҥҥэ эрэгийиэн баһылыга Рамзан Кадыров уонна Татарстан Өрөспүүбүлүкэтин бэрэсидьиэнэ Рустам Минниханов сылдьыбыттара. Кыайыылаах массыынанан уонна 150 тыһ. харчынан бириэмийэлэммитэ.

Ким кыттарый?

Легковой массыынанан пассажирдары уонна таһаҕас таһарга көҥүллээх, таксопаркаҕа үлэлиир эбэтэр ИП суоппардар кытталлар. Маны таһынан, сыл устатыгар быраабыланы (ППД) кэспэтэх буолуохтаахтара ирдэнэр.

Бастыҥы хайдах талалларый?

Куоталаһыы үс түһүмэхтээх. Суоппардар суол быраабылатын, эрэгийиэн историятын, суолу-ииһи, култуура нэһилиэстибэтин эбийиэктэрэ ханна баалларын, о.д.а. билэр буолуохтаахтар. Үһүс түһүмэххэ күрэхтэһээччилэр суолунан айанныылларыгар араас ирдэбил баар буолар («оҕо кириэһилэтин иилии», «массыынаны сэргэстэһиннэрэ туруоруу», «бордюр», о.д.а. сорудахтар күүтэллэр). Сорудахтары толоруу хаачыстыбата, биир тэҥник ыытыы сыаналанар. Маныаха, массыына үрдүгэр кырыылаах ыстакааҥҥа уу кутуллан ууруллар. Күрэхтэһии түһүмэхтэрин туһунан сиһилии официальнай балаһыанньаҕа көрүөххүтүн сөп.

Күрэхтэһии туһунан:

«Лучший водитель такси в России» сыл ахсын Арассыыйа эрэгийиэннэригэр ыытыллар уонна дойду араас муннугуттан идэлэригэр бастыҥнары түмэр. Сыала-соруга – такси суоппарын идэтин киэҥник тарҕатыы, суоппар оруолун үрдэтии, пассажирдары таһыы хаачыстыбатын тупсарыы.

+1
0
+1
0
+1
0
+1
0
+1
0
+1
0
+1
0