«Саха сирин бастыҥ табаардара-2022» күрэс кыайыылаахтара

Ааптар: 
Бөлөххө киир:

«Саха сирин бастыҥ табаардара-2022» өрөспүүбүлүкэтээҕи күөн күрэс сыллата үрдүк тэрээһиннээхтик ыытыллар. 

Быйылгы күрэскэ өрөспүүбүлүкэ сэттэ улууһуттан уонна Дьокуускай куораттан барыта 22 тэрилтэ уопсайа 34 араас көрүҥүнэн кытынна.
Хаачыстыбаны сыаналыыр, көрөр-истэр хамыыһыйа сүбэ мунньаҕын вице-премьер Михаила Никифоров иилээтэ-саҕалаата. Күрэс түмүгүнэн түөрт араас номинацияҕа кыайыылаахтар быһаарылыннылар.
Манна даҕатан эттэххэ, СӨ Ил Дархана Айсен Николаев олохтоох табаары, аһы-үөлү оҥорон таһаарыыга, өҥөнү оҥорууга хаачыстыбаны үрдэтэргэ, атыыга батарыыны кэҥэтэргэ далааһыннаах үлэни тэрийэн ыытарга сыал-сорук туруорбута. Бу туруоруллубут сорук иитинэн үлэ тиһиктээхтик салҕанар.
Быйылгы күөн күрэс кыайыылаахтара дипломнарынан наҕараадаланаллар уонна хамыыһыйа быһаарыытынан «Арассыыйа 100 бастыҥ табаара» бүтүн Арассыыйатааҕы куоталаһыыга кыттарга мэктиэлэнэллэр. Бары дипломаннар «Саха сирин бастыҥ табаара-2022» диэн логотибы ыйар бырааптаналлар.
«Саха сирин бастыҥ табаара-2022» күрэс бастакы истиэпэннээх дипломаннарынан буоллулар:

«Продовольственные товары» номинацияҕа — Дьокуускайдааҕы көтөрү иитэр фабрика («Солнышко» куурусса сымыытынан);
«Изделия народных и художественных промыслов» анал аат — Иван Тимофеев, саха быһаҕынан кыттан;
«Продукция производственно-технического назначения» — ИП Глеб Дюков полиграфическай үлэтинэн;
«Услуги для населения» — «Норд Пауэр» ХЭУо «Үрдэл» пааркаҕа туристическай өҥөнү оҥоруу.

Маны сэргэ, иккис, үһүс истиэпэннээх дипломаннар быһаарылыннылар.

Санатар буоллахха, өрөспүүбүлүкэҕэ бэйэ баҕатынан сертификацияланыы тиһигэ үлэлиир, атыы-эргиэн былаһааккалара тэриллэллэр. Күөн күрэскэ кыттыыга, кыайыыга хаачыстыбаны таһынан, тэрилтэлэр бэйэлэрин бородууксуйаларын «Арассыыйа сүүс бастыҥ табаара» бэлиэнэн далааһыннаахтык хамсаталларыгар кыаҕы биэрэр.

+1
0
+1
0
+1
0
+1
0
+1
0
+1
0
+1
0