Култуура Суолталаах

Саха сирин балета Соҕуруу Африкаҕа аатырда

Аксинья уонна Наталья Посельскаялар ааттарынан Саха сиринээҕи балет оскуолатын  устудьуоннара Соҕуруу-Африкатааҕы аан дойдутааҕы IX балет куонкуруһун призердарынан буоллулар.

еdersaas.ru

Кейптаун куоракка ыытыллыбыт куонкуруска 21 дойдуттан 93 үҥкүүһүт кытынна.

СӨ култуураҕа уонна духуобунай сайдыыга миниистирин солбуйааччы Марина Силина: “Куонкуруска Арассыыйаны, чуолаан биһиги өрөспүүбүлүкэбитин Балет оскуолатын устудьуоннара, өрөспүүбүлүкэ култууратын туйгуннара Алисия Пак уонна Иван Одинцов билиһиннэрдилэр. Кинилэр чахчы олус талааннаах ыччаттар, кинилэр аан дойдутааҕы, бүтүн Арассыыйатааҕы элбэх куонкуруска кыайан, хайыы үйэ өрөспүүбүлүкэбит «сирэйинэн» буолаллар. Кинилэр куонкурус дириэктэрэ тойон Дирк  Баденхорст ыҥырыытынан уонна Балет куонкурустарын аан дойдутааҕы федерациятын бэрэсидьиэнэ С.А.Усанов көмөтүнэн кытыннылар. Куонкурус түмүгүнэн Алисия Пак уонна Иван Одинцов боруонса мэтээли ыллылар уонна 3 бириэмийэ лауреаттарынан буоллулар”, — диэн үөрүүлэх сонуну тириэртэ.

Саха оҕолоро “Классическай үҥкүү” уонна “Аныгы үҥкүү” номинацияларга кытыннылар. Кинилэри куонкуруска Саха сиринээҕи балет оскуолатын дириэктэрэ, преподавателэ, СӨ үтүөлээх артыыска Дария Дмитриева бэлэмнээбитэ.

СӨ Култуураҕа уонна духуобунай сайдыыга министиэристибэтигэр иһитиннэрбиттэринэн, Саха сирин үҥкүүһүттэрин  Кейптаун куоракка РФ генеральнай консула А.В.Маленко уонна РФ Генеральнай консульствотын дипломаттара көрүстүлэр уонна өйөөтүлэр.

Надежда ЕГОРОВА, «Саха сирэ», еdersaas.ru

 

 

1
0
Telegram @edersaas20