Саха сирин олохтоохторо судаарыстыба уонна муниципальнай өҥөлөрү хайдах ылар туһунан төһө билэллэрин манна ааҕыҥ.
Аҕыйах хонуктааҕыта СӨ баайга-дуолга уонна сиргэ сыһыаннаһыыга миниистирэ Павел Иванов тустаах министиэристибэ ЕПГУ (РФ судаарыстыба уонна муниципальнай өҥөнү оҥорууга биир кэлим портал) уонна РПГУ ( өҥөнү оҥорууга эрэгийиэн портала) көмөтүнэн электроннай көрүҥүнэн судаарыстыба өҥөтүн бу сыл бастакы аҥаарыгар оҥорууга түмүктэринэн сүбэ мунньаҕы ыытта.
Ол курдук, сыл бастакы аҥаарыгар министиэристибэҕэ 656 сайабылыанньа киирбит, маныаха электроннай көрүҥүнэн – 37 сайабылыанньа (уопсай ахсаантан 6 быр.). ЕПГУ уонна РПГУ туһанааччыларын ортотугар элбэх оҕолоохторго сир учаастактарын бас билиигэ босхо биэрии өҥөтө буолла. Ол курдук, 13 сайабылыанньа киирбит. Ону сэргэ сир учаастактарын биир категорияттан атын категорияҕа көһөрүүгэ – 9 сайабылыанньа, торганы ыытыыта суох сир учаастагын биэриигэ – 8 сайабылыанньа.
Ити эрээри бу киирбит 37 сайабылыанньаттан бииригэр эрэ сөбүлэһэр быһаарыы ылылынна. 36 сайабылыанньанан 2 өҥө оҥоһуллубатаҕа, маныаха 47 быр. – министиэристибэ быһаарыы ылынар боломуочуйата суоҕунан атын боломуочуйалаах уорганнарга ыытыллыбыта. Ону тэҥэ киирбит сайабылыанньалартан 27 бырыһыаныгар өҥөнү биэрэргэ ирдэнэр докумуоннар уонна сибидиэнньэлэр толорута суохтара атахтаабыта.
Миниистир электроннай көрүҥүнэн аҕыйах сайабылыанньа киирбитин туһунан эттэ. Онон мунньах түмүгүнэн нэһилиэнньэ судаарыстыба өҥөтүн ылыыга сайабылыанньаны электроннай көрүҥүнэн биэрэрин туһугар үлэни күүһүрдэргэ соруйда. Санатан эттэххэ, 2021 сыл атырдьах-алтынньы ыйдарыттан өрөспүүбүлүкэ олохтоохторо судаарыстыба уонна муниципальнай өҥөлөрү ЕПГУ уонна РПГУ порталларын көмөлөрүнэн тустаах уоргаҥҥа, дьаһалтаҕа эбэтэр МФЦ-га сылдьыбакка эрэ биэрэр буолбуттара.
Сайабылыанньалары электроннай көрүҥүнэн СӨ Баайга-дуолга министиэристибэтин дьиҥ саайтыгар “Государственные услуги” салааҕа маннык аадырыһынан биэрэргит табыгастаах: https://minimush.sakha.gov.ru/deya/Gosudarstvennie-uslugi/poluchit-uslugu-v-elektronnom-vide, ону тэҥэ Судаарыстыба өҥөтүн биир кэлим порталыгар (портал «Госуслуги» gosuslugi.ru) “Жизненные ситуации – недвижимость – приобретение прав на земельный участок” салааҕа.
СӨ Баайга-дуолга уонна сиргэ сыһыаннаһыыларга министиэристибэтин департамена
Бэлэмнээтэ Женни Стрюкова
Хаартыска: тустаах саайтан