Саха сирин баһылыга Тырааныспар министиэристибэтин бырайыагын кириитикэлээтэ
Айсен Николаев Уһук Илиҥҥи тиэйээччини биир кэлим хампаанньа буолбакка, альянс курдук тэрийэргэ этии киллэрбитэ, итиннэ өрөспүүбүлүкэ былааһын хонтуруолугар баар “Полярные авиалинии” уонна “Якутия” авиахампаанньа киириэ этилэр.
edersaas.ru
Саха сирин баһылыга Айсен Николаев “Аэрофлот” кыттыгас хампаанньата “Аврора” баазатыгар биир кэлим Уһук Илиҥҥи авиахампаанньаны тэрийэр туһунан Тырааныспар министиэристибэтин былаанын утары тыл эттэ, диэн “Интерфакс” иһитиннэрэр.
Бээтинсэҕэ ыытыллыбыт Федерация Сэбиэтин иһинэн Арктикаҕа уонна Антарктикаҕа сэбиэт мунньаҕар Тырааныспар министиэристибэтин гражданскай авиация салаатыгар госбэлиитикэ департаменын баһылыгын солбуйааччы Илья Белавинцев иһитиннэрбитинэн, бастакы түһүмэххэ “Аэрофлот” бэйэтин “кыттыгаһын” хонтуруоллуур бакыатын Сахалин уобалаһын дьаһалтатыгар (билигин 49 быр. бас билэр) атыылыа диэбитэ, ол кэннэ атын Уһук Илиҥҥи эрэгийиэннэр былаастарыгар “Аврора” хапытаалыгар киирэргэ этиллибитэ.
Николаев итиниэхэ Уһук Илиҥҥи тиэйээччини авиахампаанньалар альянстарын быһыытынан тэрийэргэ этии киллэрдэ, итиннэ оччоҕо өрөспүүбүлүкэ былааһын хонтуруолугар баар “Полярные авиалинии” уонна “Якутия” авиахампаанньа киириэ этилэр.
“Мин хайдаҕын да иһин, Тырааныспар министиэристибэтэ авиатиэйээччилэр альянстарын туһунан хаттаан көрөллөрүгэр көрдөһөбүн. Тоҕо диэтэххэ, Саха сирэ төрдүс авиахампаанньатыгар аахсыйалааҕынан киирэрин уонна биһиэхэ (үлэлии сылдьар Саха сирин авиатиэйээччилэрэ) ночооттоох рейстэри хаалларыы – маннык быһаарыыларга сөбүлэһэр акаары буолбатахпын”, — диэн Николаев сөпсөспөтүн биллэрдэ.
Альянсы тэрийэн, кыттыылаахтар билиэттэри атыылааһыҥҥа биир тиһиги тэрийэн, биир тарыып бэлиитикэтин ыытан уонна Уһук Илиҥҥи эрэгийиэҥҥэ маршруттары үллэстиилэрин Николаев аан дойдуга олохтоммут процедуранан ааттаата. Эрэгийиэннэр былаастарын биир кэлим хампаанньаҕа киллэриигэ холонууну Саха сирин баһылыга барар сир баҕана үүтэ буолбутунан ааттаата.
Биир саҥа авиахампаанньаны тэрийиинэн үлүһүйүмэҥ, итиннэ бары субъектары киллэрэн, икки сылынан туох да үтүөнү көрүөххүт суоҕа диэн өссө төгүл этэбин”, — диэн эбэн эттэ Саха сирин баһылыга.
Икки авиахмпаанньаны холбооһунтан тэриллибит “Аврора” – “Сахалинские авиатрассы” уонна “Владивосток авиа” – Соҕуруу Сахалинскайга, Владивостокка уонна Хабаровскайга баазаланар. Уһук Илин уонна Сибиир куораттарын сылы эргиччи рейстэринэн хааччыйар, Уһук Илин эрэгийиэннэр истэригэр, Кытайга, Корея Өрөспүүбүлүкэтигэр уонна Японияҕа көтөр. 2019 сылга “Аврора” 1,66 мөл пассажиры тиэйбитэ. Пааркатыгар 23 сөмөлүөттээх — Airbus A319 уон орто магистральнай уонна 13 турбовинтовай Airbus A319. Ол эрээри биир кэлим Уһук Илиҥҥи авиахампаанньа бырабыыталыстыба толкуйунан Арассыыйа сөмөлүөттэринэн эрэ көтүөхтээх. Бырамыысылананс миниистирэ Денис Мантуров маннык тиэйээччигэ 20 Sukhoi Superjet 100 бэриллиэн сөп диир.
Арктикаҕа уонна Антарктикаҕа сэбиэт мунньаҕар от ыйын 17 күнүгэр Айсен Николаев бэрэсидьиэн сорудаҕын толорон, Уһук Илин ФУо үлэлиэхтээх Уһук Илиҥҥи авиаальянс Арассыыйаҕа оҥоһуллубут суудуналары туһаныахтаах диэн өссө төгүл эппитэ. “Биһиги бэйэбит бырамыысыланнаспытын уонна дойду авиациятын өйүөхтээхпит. Арктиканы, Хоту дойдуну уонна Уһук Илини Арассыыйа сөмөлүөттэрэ хааччыйыахтара диэн эрэнэбин”, — диэтэ Саха сирин баһылыга.
edersaas.ru