Саха сирин баһылыга уонна РусГидро генеральнай дириэктэрэ эрэгийиэҥҥэ электроэнергетика сайдыытын дьүүллэстилэр
Саха сирин баһылыга уонна РусГидро генеральнай дириэктэрэ эрэгийиэҥҥэ электроэнергетика сайдыытын дьүүллэстилэр.
Саха Өрөспүүбүлүкэтигэр Русгидро бырабылыанньатын бэрэссэдээтэлэ – генеральнай дириэктэрэ Виктор Хмарин өрөспүүбүлүкэ баһылыгын Айсен Николаевы кытта көрсөн, эрэгийиэҥҥэ уот энергетиката сайдыытын кытта сибээстээх боппуруостары дьүүллэстилэр диэн РусГидро пресс-сулууспата иһитиннэрэр.
Саха сирэ – Уһук Илиҥҥэ РусГидро баар эрэгийиэннэриттэн биирдэстэрэ. РусГидро баһылыга этэринэн, чугастааҕы сылларга өрөспүүбүлүкэ сиригэр-уотугар РусГидро Бөлөҕө уот энергетикатыгар кэккэ бөдөҥ инвестиция бырайыактарын олоххо киллэриэҕэ.
Оробуочай көрсүһүү кэмигэр өрүттэр РусГидро Бөлөҕөр киирэр “Якутскэнерго” баазатыгар өрөспүүбүлүкэ уот ситимин активтарын түмүүгэ былаанын, саҥа уонна кэскиллээх туһанааччылары уотунан хааччыйыыны эрэллээх оҥорууга эбийиэктэри тутууну, тарыыбы сүрүннээһини дьүүллэстилэр.
Көрсүһүү иннинэ РусГидро бырабылыанньатын бэрэссэдээтэлэ – генеральнай дириэктэрэ Виктор Хмарин, өрөспүүбүлүкэ баһылыга Айсен Николаев уонна “АЛРОСА” АК бырабылыанньатын бэрэссэдээтэлэ – генеральнай дириэктэрэ Сергей Иванов Бүлүүтээҕи ГЭС Каскадыгар уонна “АЛРОСА” АК Светлинскэйдээҕи ГЭС-кэ сылдьан, өрөспүүбүлүкэҕэ гидроэнергетиканы сайыннарыыны тула кэпсэппиттэрэ.
Оробуочай көрсүһүү кэмигэр сылаас генерациятын эбийиэктэрин саҥардыыга уонна сайыннарыыга уонна туһанааччылары сылааһынан хааччыйыыны дьүүллэстилэр. РусГидро Бөлөҕүн былааннаммыт бөдөҥ бырайыактарынан Нерюнгритааҕы ГРЭС-и кэҥэтии буолуоҕа, манна уопсайа 450 МВт кыамталаах икки саҥа энергоблок тутуллуоҕа уонна 160 МВт/200 Гкал/ч кыамталаах Дьокуускайдааҕы ГРЭС-2 иккис уочаратын тутуу. Иккис уочарат 50 тахса сыл үлэлээн эргэрбит Дьокуускайдааҕы ГРЭС-и солбуйуоҕа. Уот ыстаансыйата айылҕа гааһынан үлэлиэҕэ уонна уотунан уонна сылааһынан эрэгийиэн киин куоратын хааччыйыаҕа.
Маны сэргэ билигин Нерюнгритааҕы үс уот блогун тупсаран оҥоруу бырагырааматын олоххо киллэрии саҕаланна. Түөрт сыл устата уот ыстаансыйатын бигэ туруктаах оҥорууга 5 млрд солкуобайтан тахса угуллуоҕа. Бу уоту оҥорууну сылга 600 мөл кВт. ч тиэрдиэҕэ.
1962 сыллаахха үлэҕэ киирбит 48 МВт уот кыамталаах уонна 165 Гкал/ч сылаас кыамталаах Чульманнааҕы эргэ ТЭЦ сыыйа туһаныыттан тахсыаҕа. Уоту оҥорууга Чульманнааҕы ТЭЦ-и Нерюнгритааҕы ГРЭС солбуйуоҕа, оттон РусГидро ыстаансыйатын сылааска кыамтатын солбуйууга айылҕа гааһынан үлэлиир аныгы хочуолунайы тутуохтара.
Локальнай энергетиканы саҥардыы Саха сиригэр эмиэ күүтүллэр. Эрэгийиэн уратытынан бэйэ-бэйэлэриттэн уонна кииннэммит уотунан хааччыйыыттан ойдом сытар уонунан ахсааннаах нэһилиэнньэлээх пууннардаахтара буолар. РусГидро итилэри аныгы технологияларынан хааччыйыаҕа: үрдүк көдьүүстээх аныгы дизельнэй уот ыстаансыйалара, күн күүһүнэн үлэлиир уот ыстаансыйалара, уот энергиятын мунньааччылар, автоматика тиһигин көмөтүнэн салайыы уонна тэйиччиттэн кэтээн көрүүнү киллэрии. Бу үлэлэри “Арассыыйа Федерациятын 2024 сылга диэри кэмҥэ сайдыытын национальнай сыалларын уонна стратегическай соруктарын туһунан” 2018 сыл ыам ыйын 7 күнүнээҕи РФ Бэрэсидьиэнин Ыйааҕын толоруу чэрчитинэн оҥоһуллар.
Локальнай энергетиканы саҥардыыга үлэҕэ дуогабарга олоҕуран инвестордар үптэрин кытыннараллар. Саха сиригэр маннык алта нэһилиэнньэлээх пууҥҥа дуогабардар түһэрсилиннилэр, өссө 65 нэһилиэнньэлээх пууҥҥа уот комплекстарыгар куонкурус процедурата ыытыллар.
Көрсүһүүгэ Дьокуускайы сылааһынан хааччыйыыга болҕомто уурулунна. Билигин туһанааччылары сылааһынан бигэтик хааччыйыыга РусГидро алын сүһүөх тэрилтэтин “Якутскэнерго” тэрилтэ баазатыгар уонна “Теплоэнергия” АУо муниципальнай бас билиитигэр баар активтарынан холбоһуктаах тэрилтэтин тэрийии боппуруоһа көрүллэр.
Салгыы бу хайысхаҕа альтернативнай хочуолунай ньыматыгар көһүү боппуруоһун ырыталлар. Маныаха сылаас сыанатын судаарыстыба буолбакка, оҥорон таһаарааччылар, туһанааччылар уонна сылаас ситимин тэрилтэтэ олохтуохтаахтар. Сыана таһыма тутулуга суох хочуолунай туһатыгар кииннэммит сылааһынан хааччыйыыттан акаастаныы түгэнигэр ороскуот гипотетическай кээмэйиттэн тутулуктаах.
СИА.
Бэлэмнээтэ Женни Стрюкова
Хаартыска: тустаах саайтан