Саха сирин баһылыга судаарыстыбанан оҕолоох ыаллары өйүүргэ эбии миэрэлэри ылынарга эттэ
Москваҕа оробуочай сырыытын кэмигэр Айсен Николаев Уһук Илин федеральнай уокуругун эрэгийиэннэрин тэтимнээх сайдыытыгар туһуламмыт көҕүлээһиннэри торумнуур РФ Бырабыыталыстыбатын оробуочай бөлөҕүн холбоһуктаах мунньаҕар кытынна.
Бастакы уочараттаах соруктары федеральнай министиэристибэлэр уонна биэдэмистибэлэр, тустаах уокурук эрэгийиэннэрин салайааччылара дьүүллэстилэр.
Саха сирин баһылыга дьиэ кэргэҥҥэ бастакы уонна онтон өссө төрүүр оҕолорго судаарыстыба өйөбүлүн эбии миэрэлэрин киллэрэргэ көҕүлээтэ.
“Уһук Илиҥҥэ мэдиссиинэ каадырдара” көҕүлээһини дьүүллэһии чэрчитинэн Айсен Николаев УИФуо доруобуйа харыстабылын салаатыгар каадырдары бэлэмниир үөрэх тэрилтэлэригэр бүддьүөт миэстэтин ахсаанын эбиини көрөргө этии киллэрдэ.
Саха сирин баһылыга этэринэн, социальнай эйгэ уонна доруобуйа харыстабылын сайыннарыы дьон олоҕун уйгутун үрдэтиигэ тирэх буолаллар, оттон ийэ буолууну, дьиэ кэргэни уонна оҕо сааһы өйөөһүн – былаас саамай дьоһун соруга, маны быһаарыыттан Уһук Илин уонна дойду бүттүүнүн инники олоҕо тутулуктаах.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан