Коронавирус тарҕаныытын кытта сибээстээх балаһыанньа тупса илик. Нэдиэлэ анараа өттүнээҕи турук оннунан турар. Бу туһунан бэс ыйын 23 күнүгэр Суһал ыстаап уочараттаах мунньаҕар өрөспүүбүлүкэ баһылыга Айсен Николаев эттэ.
Роспотребнадзор чахчытынан, бэс ыйын 23 күнүгэр ыарыы 95 түгэнэ бэлиэтэннэ. Ол курдук, Дьокуускайга — 57, Алдан оройуонугар — 7, Мэҥэ Хаҥалас, Мииринэй, Нерюнгриоройуоннарыгар — 5-тии, Эбээн Бытантай улууһугар — 4, атын оройуоннарга бииртэн үскэ диэри.
Билигин 60 киһи реанимацияҕа ыарахан туруктаах сытар, кинилэртэн 2 киһини ИВЛ аппараатыгар холбоотулар. Ааспыт сууккаҕа 5 киһи олохтон туораата.
Бэҕэһээ коронавирус дьаҥыттан быһыы бастакы компоненын 1628 киһи, иккис компонены — 2,5 тыһ. киһи ылла. Бэс ыйын 22 күнүгэр өрөспүүбүлүкэҕэ 2700 вакцина кэлэн, Дьааҥы уонна Эбээн Бытантай оройуонугар ыытыллыаҕа.
Саха сирин Бырабыыталыстыбатын вице-премьерэ, өрөспүүбүлүкэ ыстаабын салайааччытын солбуйааччы Ольга Балабкина бэс ыйын 16 күнүттэн 22 күнүгэр диэри дьаҥ 650 түгэнэ тахсыбытын эттэ. Дьокуускайга ыарыы арыычча аччаабыт буоллаҕына, оройуоннарга тастан кэлии суотугар элбээтэ.
Алдан, Дьааҥы, Нам, Нерюнгри, Өймөкөөн, Сунтаар, Чурапчы, Эбээн Бытантай улууһугар үрдээтэ. Ыарыы ону тэҥэ Амма, Мэҥэ Хаҥалас, Таатта, Уус Алдан, Усуйаана, Хаҥалас улуустарыгар оннунан турар. Нэдиэлэ устата 11 оройуоҥҥа ыалдьыбатылар.
Роспотребнадзор СӨ управлениетын салайааччыта Маргарита Игнатьева ыарыыны тохтотор туһугар кэлэр дьону хонтуруоллуохха диир.
Мунньах түмүгүнэн өрөспүүбүлүкэ суһал ыстаабын салайааччыта Айсен Николаев эрэгийиэҥҥэ эпидбалаһыанньа судургута суоҕун бэлиэтээтэ. Айсен Сергеевич өрөспүүбүлүкэ бөдөҥ тэрээһиннэрин — Өлүөхүмэҕэ Олоҥхо ыһыаҕын уонна Горнайга Манчаары оонньууларын куттала суох ыытыыга туһаайда. Горнай оройуонугар ыарыы аччаабат уонна быһыыны ылыы бытаан.Хаалбыт кэмҥэ балаһыанньа көммөтөҕүнэ, Оонньуулары ыытыы уларыйыан сөп.
Маны сэргэ быһыыны ылбыттары биһирээһин туһунан этиилэри ырыттылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова.