Ньурба оройуонугар оробуочай сырыытын кэмигэр өрөспүүбүлүкэ баһылыга Айсен Николаев Антоновка сэлиэнньэтигэр спорт комплексы тутуу хаамыытын билистэ.
Ньурба оройуонугар өр күүтүүлээх тутуу быйыл кулун тутартан саҕаламмыта. Икки мэндиэмэннээх 1471 кв м иэннээх комплекс федеральнай, өрөспүүбүлүкэ уонна муниципальнай бүддьүөт көмөлөрүнэн тутуллар. Бу тутуу сыаната 122 мөлүйүөн солкуобайга тэҥнэһэр. Маныаха “ПСФ-Баттстрой” ХЭТ генеральнай бэдэрээтчитинэн буолар.
Ньурба оройуонун баһылыгын тутууга уонна ОДьКХ-ҕа солбуйааччы Макар Семенов бэлиэтииринэн, тутуу түмүктэнэн эрэр, сүрүн инженернэй тиһиктэргэ холбообуттар. Аны вентиляциятын шаахтатын, ис оҥоһугун ситэриэхтэрэ, уот тэрилин туруоруохтара уонна күрүөтүн-хаһаатын оҥоруохтара. Эбийиэк 74 бырыһыана бэлэм буолла.
Оройуон баһылыга Алексей Иннокентьев этэринэн, саҥа спорт комплексыгар бастакы тэрээһиннэртэн биирдэстэринэн “АЛРОСА” хампаанньа өйөбүлүнэн Хапсаҕай кубога ыытыллыаҕа.
Сиһилии билсэн баран, Айсен Николаев эбийиэк бэлэмнээҕин бэлиэтээтэ уонна үлэни сыл бүтүөр диэри түмүктүүргэ сорудахтаата. Онуоха муниципальнай былаастар тутууну ахсынньы 20 күнүгэр түмүктүөхпүт диэн эрэннэрдилэр.
Эбэн эттэххэ, комплекс “Демография” национальнай бырайыак “Спорт – олох ирдэбилэ” федеральнай бырагыраама чэрчитинэн тутуллар уонна спордунан дьарыктанааччылар ахсааннара элбииригэр төһүү буолуохтаах. Маны сэргэ бырагыраама көмөтүнэн өссө икки эбийиэк тутуллар кыахтаммыта – Жатайга сөтүөлүүр бассейн уонна Аллараа Бэстээххэ универсальнай саалалаах уонна сөтүөлүүр бассейннаах комплекс.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Женни Стрюкова бэлэмнээтэ.