Саха сирин баһылыга губернатордар национальнай рейтиннэригэр үрдүк балаһыанньалаах
Саха Өрөспүүбүлүкэтин баһылыга Айсен Николаев “Национальнай рейтинг” федеральнай уопсастыбаннай бырайыак чахчытынан Арассыыйа губернатордарын куорпуһун бастыҥнарын бөлөҕөр бигэ балаһыанньалаах. Саҥардыллыбыт рейтиҥҥэ кини дойду субъектарын салайааччыларын ортотугар ахсыс миэстэҕэ сылдьар.
Губернатордар национальнай рейтиҥнэрин эспиэрдэрэ этэллэринэн, маныаха кулун тутар ый бүтүүтэ ыытыллыбыт өрөспүүбүлүкэ киин куоратын мээрин быыбарыгар “Биир ньыгыл Арассыыйа” баартыйа бэрэстэбиитэлэ Евгений Григорьев кыайыыны ситиспитэ төһүү буолбут. “Судаарыстыбаннай Дуума дьокутааттарын быыбарын иннинэ Дьокуускай саҥа мээрэ бүтүн норуот куоластааһынынан күрэстэһиилээх киирсиигэ талыллыбыта эрэгийиэҥҥэ “былаас баартыйата” бигэ туруктааҕын көрдөрөр. Евгений Григорьевка сүрүн соруктартан биирдэстэринэн Айсен Николаев Дьокуускайга национальнай бырайыактары ситиһиилээхтик толоруу соругун туруорбута”, — диэн бэлиэтээтилэр чинчийии ааптардара.
Ону сэргэ Саха сирин баһылыга өрөспүүбүлүкэҕэ дьоһун суолталаах инфратсруктура бырайыагын олоххо киллэриини – Өлүөнэ муостатын тутууну олоххо киллэриини тиһиктээхтик ыытар. “Айсен Николаев РФ Бырабыыталыстыбатын вице-премьерэ Марат Хуснуллины кытта хаста да көрүстэ, итиннэ үрдүк сололоох федеральнай чунуобунньук өрөспүүбүлүкэҕэ улахан суолталаах бырайыагы өйүүрүн биллэрбитэ. Маныаха Бырабыыталыстыба хамыыһыйата эмиэ туһааннаах түмүктээһини оҥорбута.
Маны тэҥэ РФ Бэрэсидьиэнэ Владимир Путин Федеральнай Мунньахха Анал этиитигэр эрэгийиэннэри сайыннарыыга киллэрбит миэрэлэрэ Саха сирэ судаарыстыба биэрэр инфраструктураҕа кирэдьиитин ыларыгар кыаҕы биэрэр, ити Өлүөнэ муостатын тутуу бырайыагын олоххо киллэриигэ үтүө өттүнэн төһүү буолуоҕа, — диэн иһитиннэриигэ бэлиэтээтилэр.
Эспиэрдэр ону тэҥэ Саха сирин баһылыга өрөспүүбүлүкэҕэ доруобуйа харыстабылын сайыннарыыга уонна Арассыыйа бөдөҥ эрэгийиэнигэр “Доруобуйа уон сылын” биллэриитин бэлиэтээтилэр. Ил Дархан бу хайысхаҕа ылынар миэрэлэрэ үчүгэй түмүгү биэрэллэр. Эрэгийиэҥҥэ нэһилиэнньэ быһыыны ылыыта былааннаахтык ыытыллар, мэдиссиинэ бөдөҥ тэрилтэлэрэ тутуллаллар, доруобуйа харыстабылыгар өрөспүүбүлүкэ олохтоохторо тиксэллэр.
Айсен Николаев Саха сирин соҕуруу өттүн бырамыысыланнаһын кыаҕын сайыннарыыга көхтөөхтүк үлэлиирэ ахтылынна, балары РФ бэрэсидьиэнэ Владимир Путин дойду бырабыыталыстыбатыгар дойду илиҥҥи чааһыгар тимир суол тиһигин сайыннарыыга быһаччы сорудаҕынан бигэргэтиллибитэ.
Ырытааччылар этэллэринэн, Транссиб уонна БАМ аһарар кыаҕын үрдэтии Саха Өрөспүүбүлүкэтин социальнай-экэнэмиичэскэй балаһыанньатыгар сабыдыаллыаҕа.
Айсен Николаев үлэтин көдьүүһүнэн Саха сирин социальнай-экэнэмиичэскэй сайдыытыгар эрэгийиэн кыра уонна орто нэһилиэктэригэр хамнас таһымын статистикатын чахчылара уонна өрөспүүбүлүкэҕэ ипэтиэкэни туһаныы көрдөрөллөр. Бу көрдөрүүлэргэ Саха сирэ Арассыыйа Федерациятыгар туһааннааҕынан 7-с уонна 8-с миэстэлээх.
Саха сиригэр сэлии салаатын тэрийии кэскилэ чинчийээччилэри эмиэ сэҥээртэ. Маныаха кэпсэтии сэлии муоһун үгэс курдук хомуйууга уонна таҥастааһыҥҥа буолбакка, клоннааһын кэскиллэригэр уонна хостонор кыыллары үөскэтиигэ туһаайыллар. Биллэн турар, бу кэскиллээх бырайыак олоххо киирэр кыахтаах.
Онон түмүккэ Саха сирин баһылыга “Национальнай рейтинг” инники күөҥҥэ сылдьааччыларын бөлөҕөр бигэтик киирдэ.
СИА.
Бэлэмнээтэ Женни Стрюкова
Хаартыска: тустаах саайтан