Саха сирин баһылыга Айсен Николаев Холбоһуктаах Авиа-тутар Корпорация генеральнай дириэктэрэ Юрий Слюсарьдыын көрүстэ.
Оробуочай көрсүһүү сүрүн тиэмэтинэн Саха Өрөспүүбүлүкэтин Бырабыыталыстыбатын уонна “ОАК” ПАУо кытта SSJ100 салгын суудуналарын туһаныы, ону тэҥэ тэриллэр Уһук Илин авиахампаанньалар альянстарыгар дойдуга оҥоһуллар салгын суудуналарын туһаныы туһунан кэпсэттилэр.
Уһук Илин эрэгийиэннээҕи авиахампаанньалар альянстарын тэрийии – Арассыыйа Федерациятын Бэрэсидьиэнэ туруорбут соругун толоруу. Бииргэ үлэлээһин кэмиэрчэскэй уонна технологическай тэриллэри, салгын суудуналарын пааркатын туһаныыга көмөлөһүөҕэ, саппаас чаастары, үөрэтэр кииннэри бииргэ туһанар кыаҕы биэриэҕэ.
“Киэҥ сирдээх-уоттаах өрөспүүбүлүкэбитигэр авиация сүҥкэн суолталаах. Онон авиация сырыыта, көтүүгэ куттал суох буолуута, эрэгийиэн авиахампаанньаларын бигэ-таҕа тиэхиньикэнэн хааччыйыы – биһиэхэ, биллэн турар, тумус тутуллар суолталаахтар”, — диэн Айсен Николаев бэлиэтээтэ.
Саха сирин баһылыга Уһук Илин федеральнай уокуругар Арассыыйа салгын суудуналарын оҥорон таһаарыыга уонна туһаныыга экэнэмиичэскэй көрүҥүн эбии чочуйан оҥорорго эттэ. Бу ааҕыыга-суоттааһыҥҥа урут Саха Өрөспүүбүлүкэтин Бырабыыталыстыбата уонна “Якутия” авиахампаанньа авиация салаатын бастыҥ тэрилтэлэрин уонна научнай-чинчийэр институттарын кытта SSJ-100 уонна Ил 114-300 Арассыыйаҕа оҥоһуллар салгын суудуналарын икки көрүҥүн туһаныыны хааччыйар эрэгийиэннээҕи авиахампаанньа маастар-моделын тэрийии буолуоҕа.
Бу көрүҥү (моделы ) олоххо киллэриигэ Саха сирин авиа-тэрилтэлэригэр 2024 сылга диэри Сухой Суперджет-100 тииптээх салгын 19 суудунатыттан итэҕэһэ суоҕу оҥоруохха наада.
“Бүгүн биһиги Сухой Суперджет-100 туһаныы эйгэтин баһылаатыбыт, чуолаан, Уһук Илиҥҥэ, ордук биһиги тыйыс айылҕалаах өрөспүүбүлүкэбитигэр. Ол иһин Уһук Илин авиахампаанньаларын эрэгийиэннээҕи альянсын тэрийиигэ биһиги уопуппут туһалаах буолуоҕа, — диэтэ Саха сирин баһылыга. – Биһиги Уһук Илин авиахампаанньалар холбоһуктарыгар киириэхпитин баҕарабыт, ол эрээри бэйэбит былааммытынан сайдыахтаахпыт уонна дойдуга оҥоһуллар тиэхиньикэни муҥутуурдук туһаныахтаахпыт”.
“Биһиги сөмөлүөттэрбитин ис ырыынакка таһаарыы уонна Арассыыйа авиахампаанньаларын хааччыйыы – “ОАК” сүрүн соруктарыттан биирдэстэрэ. Бу биисинэспит тутаах чааһа, тоҕо диэтэххэ, дойдуга оҥоһуллубут тиэхиньикэҕэ эрэгийиэн авиахампаанньалара ордук наадыйаллар. Биһиги “Якутия” авиахампаанньаны кытта Суперджет сөмөлүөккэ ситиһиилээхтик үлэлэспиппит уонна пассажирдары тиэйиигэ араас ахсааннаах миэстэлээх сөмөлүөттэр кэрискэлэрин биэрэргэ бэлэммит”, — диэтэ “ОАК” ПАУо генеральнай дириэктэрэ, “СоюзМаш России” ОООР вице-бэрэсидьиэнэ Юрий Слюсарь.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА
Хаартыска: тустаах саайтан