Саха сирин Атыылаһыыга киинин порталын саҥардан оҥордулар

Бөлөххө киир:

Тустаах табаары уонна өҥөнү ылыыга бүддьүөт тэрилтэлэрэ атыылаһыыны ааһаллар. Онуоха үгүс исписэлиистэр бу үлэни ыарырҕаталлар. Саха сиринээҕи Атыылаһыы киинэ СИА-ҕа «госзакупка» эрэгийиэннээҕи порталын саҥардыы бырайыагын туһунан кэпсээтэ.

«Биһиги хас эмэ кэм устата портал туһалаах уонна интэриэһинэй буоларын туһунан толкуйдаабыппыт. Онтон порталга ыйар-кэрдэр матырыйааллары, исписэлиистэргэ анаан араас формалары, шаблоннары, итиэннэ быраап аакталарын саҥардан киллэрдибит. Кэллиэгэлэрбитин кытта мунньахтаан бараммыт, ураты быһаарыныыны ылынныбыт — ыйар-көрдөрөр быраап систиэмэтин «госзакупкалар» порталларын кытта бииргэ туруордубут», — диэн Киин дириэктэрэ Алексей Попов кэпсиир.

2020 сыл балаҕан ыйыгар киин уонна «Айтек Инфо» хампаанньа  «WEB-Торги-КС» атыылаһыы автоматизированнай систиэмэтин салайыыны саҥаттан оҥорууга хантараак түһэрсибиттэр. Манна сүрүн соругунан туһанааччылары нормативнай аактынан уонна ГАРАНТ систиэмэ матырыйаалларынан хааччыйыы буолар,  итиэннэ Арассыыйаҕа сокуону таһаарыы сонуннарынан эмиэ. Бу портал сэтинньигэ үлэтин саҕалаабыта.

Портал туһанааччылара бэлиэтииллэринэн, «Гарант» хампаанньаттан Гарант Коннект саҥа технология көмөтүнэн наадалаах докумуоннары булуохха, сонуннары ааҕыахха сөп. Оттон докумуоннарга саҥа уларытыылар киирдэхтэринэ, тута саайтка бэйэтэ уларыйан иһэр эбит.

«Айтек-Инфо» хампаанньа дириэктэрэ Айсен Иванов бэлиэтииринэн, Гарант Коннект технологията туһалаах уонна уратылаах: «Бу сервис ГАРАНТ систиэмэтин олохсуйбут баазатын уонна ньымаларын атын ханнык баҕар саайтары, систиэмэлэри кытта тэҥҥэ үлэлиир кыаҕы биэрэр. Туһанааччыларга элбэҕи биэриэн сөбүн өйдөөн, ырыынакка киэҥник таһаардыбыт. Атыылаһыы киинин кытта көрсөн баран, судургута суох, ол эрээри олус интэриэһинэй соругу туруоруннубут. Биһиги бырайыакпыт Арассыыйаҕа бастакы уопут буолар. Бу иннинэ Гарант Коннект технологияны атыннык туһаныы холобурдара бааллара, ол эрээри маннык киэҥ хабааннаах көхтөөх үлэ бастакытын ыытылынна. Уопсайынан диэн эттэххэ, саҥардан оҥоруубут түмүгүттэн астынныбыт, ол да буоллар өссө даҕаны элбэх үлэ күүтэр. Бу сонун идиэйэбитин сайыннаран иһиэхпит диэн эрэнэбин».

Киин дириэктэрэ Алексей Попов бэлиэтииринэн, бырайыак үтүө түмүктээх буолбут. Портал саҥардыллан, туһанааччыларга өйдөнүмтүө буолла. Бу бырайыак өрөспүүбүлүкэ урбаанньыттарыгар уонна судаарыстыбаннай тэрилтэлэр, хааччыйааччылар атыылаһыыга исписэлиистэрин өйүүр сыалтан оҥоһулунна.

+1
0
+1
0
+1
0
+1
0
+1
0
+1
0
+1
0