Саха сирин АПК –тын элбэх үлэһитэ санаторийынан-куруордунан туһаныахтара
Саха сирин АПК –тын элбэх үлэһитэ санаторийынан-куруордунан туһанар кыахтаныахтара – чэпчэтиилээх санатоий-куруорт путевката бэриллэр АПК үлэһиттэрин кэрискэтэ 45 идэҕэ диэри кэҥэтилиннэ. Саха сирин Бырабыыталыстыбатын туһааннаах уурааҕа бүгүн эрэгиийэннээҕи миниистирдэр кэбиниэттэрин мунньаҕар ылылынна.
“Бырайыак өйөннө уонна АПК үлэһиттэрин санаторийынан-куруордунан киэҥник хабыллар кыахтанна. Бу күҥҥэ диэри кэрискэҕэ 20 позиция (идэ) киирэрэ, ол иһигэр табаны иитии идэтигэр (биригэдьиир-табаһыт, бостуук-табаһыт, зооветисписэлиисс-табаһыт уонна чуум үлэһитэ). Саҥа эрэдээксийэҕэ бу кэрискэҕэ Бүтүн Арассыыйатааҕы идэ классификаторыгар олоҕуран 45 идэ киириэҕэ”, — диэн быһаарда Саха сирин тыатын хаһаайыстыбатын миниистирэ Александр Атласов.
Холобура, кэрискэҕэ эбии бэтэринээринэй биэлсэр, мелиоратор, ихтиолог, тыа хаһаайыстыбатын табаарын оҥорооччу биирдэм урбаанньыт, үүнээйини үүннэрии маастара, охотовед, техник-осеменатор уо.д.а киирдилэр.
2022 сылга идэ кэрискэтэ 45 позицияҕа диэри кэҥээбитинэн Саха сирин тыатын хаһаайыстыбатын 8 тыһыынча үлэһитэ судаарыстыбаттан өйөбүлүнэн туһаныахтара – санаторийдарга-куруортарга чэпчэтиилээх путевканан.
Маны тэҥэ Саха сирин хотугу уонна Арктикатааҕы оройуоннарыттан АПК үлэһиттэрэ санаторийга-куруорка барар буоллахтарына куораттар икки ардыларыгар таксинан айанныырга айаннарын 100 бырыһыан толуйар кыах үөскээтэ.
Чопчулаатахха, туһанылла сылдьар эрэдээксийэҕэ айан сыанатын толуйууга тимир суолунан, уу уонна авиация тырааныспарынан эконом-кылааһынан киирэ сылдьара, билигин итиннэ куораттар икки ардыларыгар массыынанан таксинан айан эбилиннэ. Маны сэргэ санаторийга-куруорка эмтэнии болдьоҕо 18 күнтэн 14 күҥҥэ диэри аччаата. Александр Атласов этэринэн, бу сарбыйыы АПК үлэһиттэрин производствоҕа үлэлэрин кытта сибээстээх, кинилэр тыа хаһаайыстыбатын үлэтиттэн уһуннук барар кыахтара суох. Арассыыйа Үлэҕэ министиэристибэтин бирикээһигэр олоҕуран, маннык эмтэнии болдьоҕо 14-тэн 21 күн уһуннаах буолар.
Ылыныллыбыт уураах дьиҥ таһымнаахтык бэчээттэммит күнүттэн үлэҕэ киириэҕэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин хаартыската
Бэлэмнээтэ Женни Стрюкова