Саха сирин алта олохтооҕор СӨ култууратын уонна ускуустубатын бочуоттаах үлэһитэ ааты иҥэрдилэр

Арассыыйаҕа култуура үлэһитин күнүнэн СӨ култуураҕа уонна духуобунай сайдыыга миниистирэ Юрий Куприянов Саха сирин алта олохтооҕор «СӨ култууратын уонна ускуустубатын бочуоттаах үлэһитэ» бэлиэни үөрүүлээх быһыыга-майгыга туттарда.

Судаарыстыбаннай наҕараадалары өр сыллаах үтүө суобастаах үлэлэрин иһин «Саха сирин виртуозтара» скрипачтар ансаамбылларын салайааччы Раиса Дмитриева, «Туймаада» вокальнай ансаамбыл уус-уран салайааччыта Светлана Иванова, Чурапчы кулууһун култуураҕа управлениетын сүрүн исписэлииһэ Мария Герасимова, Ньурбатааҕы «Талба» Норуот айымньытын дьиэтин концертмейстерэ Афанасий Моргусов, Өлөөн улууһун култуураҕа управлениетын начаалынньыга Надежда Николаева уонна Уус Алдан сэлиэнньэлэрин икки ардыларынааҕы кииннэммит бибилэтиэкэ систиэмэтин дириэктэрэ Варвара Окоемова туттулар.

Үөрүүлээх тэрээһиҥҥэ миниистир Юрий Куприянов нэһилиэктэр култуураҕа салааларын кэлэктииптэригэр 100-түү тыһыынча солкуобайдаах сэртипикээттэри туттарда. Бу наҕараадалары «Култуура» национальнай бырайыак эрэгийиэннээҕи түһүмэҕэр бастыҥ үлэлэри билиһиннэрэн куонкуруһу ааспыттар ыллылар.

Ол курдук судаарыстыбаннай наҕараадалары өрөспүүбүлүкэ 13 тэрилтэтэ ылла: Томпо оройуонун Байаҕантай нэһилиэгин Федор Охлопков аатынан Кыраайы үөрэтэр мусуой, Нам улууһун Партизан нэһилиэгин «Хомус» фольклор дьиэтэ, Чурапчы улууһун Одьулуун нэһилиэгин Тимофей Тоскин аатынан «Сайдыс» Норуот айымньытын дьиэтэ, Уус Алдан улууһун Бэрт Ууһун нэһилиэгин «Айылгы» сынньалаҥ киинэ, Мэҥэ Хаҥалас улууһун Төҥүлү нэһилиэгин «Эйгэ» социальнай-култуурунай информационнай киинэ, Хаҥалас улууһун 2-с Дьөппөн нэһилиэгин «Ситим» култуура киинэ, Уус Алдан улууһун «Сыккыс» оҕо ааҕыытын бибилэтиэкэтэ, Күннүк Уурастыырап аатынан Амматааҕы бибилэтиэкэ, Горнай улууһун Солоҕон бибилэтиэкэтэ, Орто Халыма улууһун Сыбаатай бибилэтиэкэтэ, Үөһээ Бүлүү улууһун Дьүллүкү бибилэтиэкэтэ, Сунтаар улууһун Тойбохой бибилэтиэкэтэ, Өлөөн улууһунааҕы оҕо бибилэтиэкэтэ.

Маны таһынан, тыа сиригэр баар култуура тэрилтэлэрин 22 бастыҥ үлэһитигэр 50-нуу тыһыынча солкуобай суумалаах сэртипикээттэри туттардылар.

Ил Дархан уонна Бырабыыталыстыба дьаһалтатын пресс-сулууспата.