Бэрэсидьиэн Владимир Путин култуура уонна ускуустуба эйгэтигэр общенациональнай суолталаах айар бырайыактары өйүүргэ граннары аныыр туһунан дьаһалга илии баттаата.
edersaas.ru
Ол туһунан докумуон муус устар 30 күнүгэр официальнайдык таҕыста. Бу граннар 2019 сылга ыытыллыбыт куонкурус түмүктэринэн, бырайыактар салайааччыларыгар ананаллар.
Грант ылбыт кыайыылаах элбэх ахсааннаах бырайыактар ортолоругар Саха Өрөспүүбүлүкэтиттэн бырайыактар эмиэ бааллар.
Ол курдук, биллиилээх музыковед, учуонай, РФ култууратын үтүөлээх үлэһитэ, СӨ норуодунай артыыһа, Саха сирин норуоттарын муусукаларын уонна фольклордарын мусуойун научнай-сырдатар салаатын сэбиэдиссэйэ Аиза Решетникова «Юкагирское сказание о богатыре Эдилвее» диэн анимационнай киинэни оҥорууга бырайыага РФ Бэрэсидьиэнин гранын ылла.
Итиэннэ, кыра уонна обургу оҕолорго анаан 1941-1945 сс. Аҕа Дойду Улуу сэриитин сабыытыйаларынан каарталаах виртуальнай тууру оҥорор бырайыактаах Чурапчытааҕы А.А.Саввин аатынан Устуоруйа уонна этнография мусуойун научнай үлэһитэ Ольга Ядреева Бэрэсидьиэн гранын ылары ситистэ.
Бэрэсидьиэн гранын ылыы диэн – бу, норуот айымньытын уонна устуоруйатын араҥаччылааһын уонна сөргүтүү дьыалатыгар Саха сирин олохтоохторун үтүө үлэлэрин федеральнай таһымҥа билинии уонна Үлэ бырааһынньыгынан ураты бэлэх буолар, диэн СӨ Баһылыгын уонна Бырабыыталыстыбатын пресс-сулууспата иһитиннэрэр.
Татьяна Маркова, edersaas.ru
Сүрүн хаартыскаҕа: Быйыл кулун тутарга саха норуодунай артыыһа Аиза Решетникова үбүлүөйүн түгэниттэн. Аиза Петровнаны биир дойдулаахтара уонна Чурапчы култууратын диэйэтэллэрэ эҕэрдэлииллэр.
Ааптар хаартыскаҕа түһэриитэ.