Сүрүн Тыа хаһаайыстыбата

Саха сирин аграрийдара дойду “Көмүс күһүн” быыстапкатыттан 9 мэтээллээхтэр

Москваҕа буолбут “Көмүс күһүн” агро быыстапка куонкуруһун түмүгүн таһаардылар итиэннэ үрдүк хаачыстыбалаах аһылык бородууксуйатын оҥорон таһаарар эйгэҕэ ситиһиилэммит, племенной уонна табаарынай сүөһүнү иитиини сайыннарбыт, сүөһү хаачыстыбалаах аһылыгын бэлэмнээбит, оҕуруот аһын олордубут тэрилтэлэри наҕараадалаатыгар.  

edersaas.ru

Быыстапка иитинэн биһиги тэрилтэлэрбит РФ тыатын хаһаайыстыбатын миниистирэ Дмитрий Патрушев аатыттан наҕараадаларs туттулар. Бу – үрдүк сыанабыл! Үрдүк хаачыстыбалаах аһылык бородууксуйатын оҥорбуттарын иһин “Батамайское” ХЭУо, ИП Заморщикова Н.Ю. уонна ИП КФХ Заморщикова А.Н. наҕараадаланнылар”, — диэн бырабыыталыстыба бэрэссэдээтэлэ Андрей Тарасенко инстаграмыгар иһитиннэрдэ.

Куонкурус түмүгүнэн Ленскэй улууһуттан “Батамайское” ХЭУо “Ленскэй” диэн ааттаах сымнаҕас уонна кытаанах сыырдарын итиэннэ 55 %-наах үрдүк сыалаах (жирность) пастеризованнай чөчөгөйүн иһин икки кыһыл көмүс мэтээли ылла.

 

ИП КФХ А.Н. Заморщикова сибэккиттэн мүөтүнэн кыһыл көмүс мэтээли тутта.

ИП Н.Ю. Заморщикова “Сахачай” атыы мааркатын кучу чэй, “Күн сардаҥата”, “Боотур”, “Далбар”, “Хотун”  чэйдэригэр 5 үрүҥ көмүс мэтээли ылла.

Ону тэҥэ, Саха сирин пиэрмэрдэрин тыа хаһаайыстыбатын кооперациятын эйгэтигэр уонна өйөөһүҥҥэ компетенциятын киинигэр агропромышленнай комплекска аччыгый уонна орто урбаанньыттары сайыннарыыга дьайыытын иһин  кыһыл көмүс мэтээли туттардылар.

Санатан эттэххэ, “Көмүс күһүн-2021” быыстапка алтынньы 5-8 күннэригэр агропромышленнай комплекс нэдиэлэтин иитинэн барар. Алтынньы 4 күнүгэр өрөспүүбүлүкэ бырабыыталыстыбатын бэрэссэдээтэлэ Андрей Тарасенко уонна тыа хаһаайыстыбатын миниистирэ Александр Атласов “Агропромдаш-2021” норуоттар икки ардыларынааҕы быыстапкаҕа кыттан, аһылык уонна оҥорон таһаарар бырамыысыланнас аныгы тэрилин тиэрдээччилэри кытта кэпсэтиини ыыттыллар.

Бүгүн Саха сирэ “Росагролизинг” АУо агропромышленнай лизинговай хампаанньаны кытта бииргэ үлэлэһиигэ сөбүлэҥ түһэрсэр. Андрей Тарасенко иһитиннэрбитинэн, “Росагролизинг” АУо кытта өрөспүүбүлүкэ тыа хаһаайыстыбатын тиэхиньикэтин пааркатын саҥардар уонна уопсайынан, тыа хаһаайыстыбатын олохтоох тэрилтэлэригэр тиэхиньиичэскэй уонна технологическай саҥардыыны ыытар былааннаах.

 

СӨ Ил Дарханын уонна СӨ Бырабыыталыстыбатын пресс-сулууспата.

 

0
0
Telegram @edersaas20