РФ бырабыыталыстыбатын бэрэссэдээтэлэ Михаил Мишустин быһаарыытынан, Саха сирин аэропортарын саҥардыыга 5,59 млрд солкуобайтан тахса эбии үбүлээһин көрүлүннэ.
Ил Дархан Айсен Николаев РФ бырабыыталыстыбатын бэрэссэдээтэлэ Михаил Мишустин Дьокуускайга кэлэ сырыттаҕына өрөспүүбүлүкэҕэ суолу-ииһи, тырааныспар эйгэтин саҥардыыга улахан болҕомто наадатын туһунан этэн турар. Эбии үбүлээһин Мииринэй, Дьокуускай, Белай Гора, Бүлүү, Нерюнгри, Өлүөхүмэ, Сангаар, Депутатскай, Черскэй, Уус Ньара уонна Хаандыга аэропортарыгар барыаҕа.
– Саха сирин курдук киэҥ-куоҥ сирдээх өрөспүүбүлүкэҕэ, биһиэхэ, дьоҕус авиацияны саҥардыы тыын боппуруоспут. Экэниэмикэ өттүгэр уустуктар тахсаннар билигин тутуу матырыйаала ыараата. Ол эрээри былааннаммыт үлэлэр бары болдьохторугар киириэхтээхтэр. Федеральнай киин көмөтүнэн үгүс аэропортарбыт саҥардыллыахтара, – диэн бэлиэтиир Айсен Сергеевич.
Аграфена КУЗЬМИНА