2024 сылга диэри Саха сиригэр 15 аэропорт саҥардыллыаҕа. Бары тутуулар болдьохторугар үлэҕэ киириэхтээхтэр. Бу туһунан бэс ыйын 6 күнүгэр Ил Дархан Айсен Николаев бырабыыталыстыбаны, туһааннаах тэрилтэлэри кытары мунньах ыытта.
Санатан эттэххэ, бу үлэ суол-иис, айан-сырыы инфраструктуратын саҥардыы биир кэлим былаанынан ыытыллар. Бырагыраамаҕа барытыгар федеральнай бүддьүөттэн 38,6 млрд солкуобай көрүллүбүтэ. 2019 сыллаахха бу бырагыраамаҕа Дьокуускай, Мирнэй, Нерюнгри, Өлүөхүмэ, Ньурба, Черскэй, Эдьигээн, Белай Гора, Хаандыга, Үөһээ Бүлүү, Бүлүү, Депутатскай, Сангаар, Полярнай уонна Уус-Ньара аэропортара киирбиттэрэ. Бырагыраама чэрчитинэн, аэропортары, көтөр балаһалары саҥардыы барыахтаах, ону таһынан сорох эбийиэктэргэ эбии инфраструктура тутуллуохтаах.
Билигин былааҥҥа киирбит 15 аэропортан иккитэ бүтэн турар. Эдьигээҥҥэ, Үөһээ Бүлүүгэ көтөр балаһа, аэропортка эбии эбийиэк тутуллубута. Эһиил Нерюнгри, Сангаар, Депутатскай, Бүлүү, Хаандыга уонна Белай Гора аэропортара саҥардыллан үлэҕэ киириэхтэрэ.
– Салгын тырааныспарынан көтүү, аэропортар Саха сиригэр биир сүрүн миэстэни ылаллар. Чуолаан, Арктика, хотугу улуустарга. Онон тутуулар кэмигэр уонна ыйыллыбыт болдьохторугар үлэҕэ киириэхтээхтэр, былаантан кыратык да хаалыы тахсыа суохтаах. Хас биирдии эбийиэккэ боппуруостар бааллар, ол иһигэр тутуу матырыйаалын сыаната ыарааһына, таһаҕаһы таһыыга, тутуу ыытыллар кэмин кылгаһа. Ол эрээри ити барыта быһаарыллар, кыаллар дьыала. Үлэни-хамнаһы сөптөөхтүк дьаһайан ыыттахха өссө болдьоҕун иннинэ да тутан бүтэриэххэ сөп, – диэн иһитиннэрэр Айсен Сергеевич.
Ил Дархан манна даҕатан мунньахха Нерюнгри аэропордун көтөр балаһатын былырыын кылгас кэм иһигэр оҥорон бүтэрбиттэрин, манна үчүгэй үлэ барбытын бэлиэтээтэ. Билигин манна 300 миэстэлээх аэропорт, саахал тахсарын туоратар сулууспа эбийиэгэ, ыскылаат, ону сэргэ ууну ыраастыыр систиэмэ тутулла сылдьар. Мунньахха иһитиннэрбиттэринэн, тутуу 87 бырыһыана бүппүт, саҥа эбийиэги болдьоҕун иннинэ быйыл кыһын үлэҕэ киллэрэр былааннаахтар.
Онтон атын эбийиэктэргэ 2023-2024 сылларга диэри салҕанан барыаҕа. Билигин аэропортар өрөмүөҥҥэ турар буоланнар, Черскэйгэ уонна Полярнайга эбии рейстар оҥоһуллаллар.
Аграфена КУЗЬМИНА