Саха сирэ уонна Уһук Илиҥҥи эрэгийэн сайдыыларыгар туһуламмыт Өлүөнэ өрүһү уҥуордаан муоста тутуутун бырайыагын оннуттан хамсатыыны тэҥэ атын көҕүлээһиннэр Айсен Николаев өрөспүүбүлүкэ Аҕа баһылыгынан олоруоҕуттан ыла икки сыллааҕы үлэтин түмүгүнэн буолар.
edersaas.ru
Бу маннык бэлиэтээһини эксперт быһыытынан дойду эрэгийиэннээҕи проблемаларын Институтун социальнай чинчийиигэ лабораториятын салайааччыта Петр Кирьян оҥордо.
2018 сыл ыам ыйын 28 күнүгэр Арассыыйа Бэрэсидьиэнэ Владимир Путин ыйааҕынан Айсен Николаев Саха Өрөспүүблүкэтин Аҕа баһылыгын эбээһинэһин толорооччунан анаммыта.
«Биллэн турар, Айсен Николаев икки сыллаах үлэтин ырытыыга, бастатан туран, Өлүөнэ муостатын тутуу суолталаах боппуруоһун оннуттан хамсатыы буолар. Бу бырайыагынан өрөспүүбүлүкэ салайааччыта дойду экэниэмикэтэ сайдыытын саҥа федеральнай стратегиятын бөдөҥ бырайыактарын ахсааныгар саамай кэмигэр киирэн биэрдэ», — диэн эттэ Петр Кирьян РИА агентствотыгар.
Салгыы социальнай чинчийии лабораториятын учуонайа Саха сирин Аҕа баһылыга Айсен Николаевы «урутаан сайдыы федеральнай көҕүлээһиннэригэр сонун толкуйдаах» кыахтаах салайааччы быһыытынан сыаналаата.
«Ол курдук, «Уһук Илин ипотека» эбэтэр эмчиттэргэ анал хайысхалаах чэпчэтии курдук тосхоллор Саха сирин салайааччыта этии киллэрбитин кэннэ олоххо киирбиттэрэ. Кэмиэрчэскэйэ суох тэрилтэлэр былаас уорганнарын кытта ыкса үлэлээһиннэрин өйөбүлэ — эмиэ кини көҕүлээһинэ», — диэн бэлиэтээтэ Петр Кирьян.
Маны таһынан, дойду таһымнаах эксперт Айсен Николаев өрөспүүбүлүкэ улуустарын баһылыктарын кытта үлэтин хайысхатын уратытын чорботто. Ол курдук, Петр Кирьян муниципальнай оройуоннар кинилэр олорор усулуобуйаларынан учуотаммыт тустаах өйөбүлүнэн туһаналларын бэлиэтээтэ.
Елена ПОТОЦКАЯ, «Cаха сирэ» хаһыат, edersaas.ru
Хаартыска — интэриниэттэн.