Өрөспүүбүлүкэ аҕаларын II сийиэһэ түмүктэннэ. Тэрээһиҥҥэ 321 дэлэгээт кыттыыны ылла. Өрөспүүбүлүкэ аҕаларын III сийиэһэ аны биэс сылынан ыытыллыаҕа.
Елена ПОТОЦКАЯ, «Саха сирэ» хаһыат, https://edersaas.ru
Суолталаах тэрээһиҥҥэ кыттыыны ылбыт «Аҕалар сойуустара» уопсастыбаннай тэрилтэ толорооччу дириэктэрэ Юрий Соленов бэлиэтээбининэн, аҕалар хамсааһыннарын сайыннарыыга араас хайысхалаах үлэни ыытар регионнар тарбахха баттаналлар.
— Алтаай, Архангельскай, Нижегородскай кыраайдар, Татарстан уонна Саха сирин өрөспүүбүлүкэлэрэ уонна Ростов-на-Дону куорат аҕаларын уопсастыбаннай тэрилтэрэ үлэ уопутун атастаһыахтарын сөптөөх үлэни ыытыахтарын наада. Саха сиригэр арыгыттан аккаастаммыт нэһилиэктэр аҕаларын үлэлэрэ үчүгэй буолан, маннык улахан суолталаах быһаарыныыны ылаллара чахчы. Оҕо уһуйааннарыгар 18% эр дьон иитээччинэн үлэлииллэр эбит. Бу Арассыыйаҕа суох холобур. Биһиги үксүгэр: «Оҕо — инники кэскилбит», — диир буоллахпытына, Саха сирин аҕалара: «Оҕо — бүгүҥҥү кэскилбит «, — дииллэр эбит. Кырдьыга да оннук. Бүгүн биһиги олоххо дэгиттэр бэлэмнээх киһини иитиэн таһаардахпытына эрэ, ыччаттабыт олохторугар бигэ тирэхтээх буолаллара чахчы, — диэн санаатын үллэһиннэ Юрий Соленов.
Салгыы «Аҕалар сойуустара» уопсастыбаннай тэрилтэ толорооччу дириэктэрэ Юрий Соленов Саха сирин «Аҕалар лигалара» уопсастыбаннай тэрилтэни кытта ыкса сибээһи олохтуурун иһитиннэрдэ.
Кини улуустарга дьону кытта үлэни тэрийэр аҕалар сэбиэттэригэр туһаайан санаатын маннык тиэртэ:
— Олус интэриэһинэй хайысхалаах үлэлэргитин аны Арассыыйа таһымыгар пропагандалааҥ. Онуоха «Аҕалар сойуустара» уопсастыбаннай тэрилтэ пресс-сулууспатын салайааччыта Виталий Петуховы кытта +7 968-917-84-05 төлөпүөнүнэн эбэтэр vitaly.petukhov@nnfo.ru электроннай аадырыһынан сибээстэһэн, нэһилиэккитигэр туох интэриэһинэй үлэни ыыппыккытын суруйдаххытына, биһиги сайпытыгар таһаарарга бэлэммит. Оччотугар эһиги уоппуккут бүтүн Арассыыйа регионнарыгар тиийэ тарҕаныаҕа. Саха сиригэр аҕа хамсааһынын сайыннарыыга, эр киһи оруолун үрдэтиигэ сыһыаннаах суолталаах боппуруоска өрөспүүбүлүкэ салалтата,»Аҕалар лигалара» курдук уопсастыбаннай тэрилтэ, биирдиилээн Аҕалар сэбиэттэрэ түмүктээх үлэҕитин Арассыыйа таһымыгар сырдатар кэмҥит кэллэ. Биһиги манна миэстэтигэр үлэлээбит дьон быһыытынан эһигини, Саха сирин аҕаларын, өйүүргэ бэлэммит!
Бу курдук өрөспүүбүлүкэ аҕаларын сийиэһигэр кэлбит ыалдьыттар Аҕалар сэбиэттэрин баай уопуттарын Арассыыйа таһымыгар сырдатарга «күөх уоту уматыахтара».
Елена ПОТОЦКАЯ, «Саха сирэ» хаһыат, https://edersaas.ru
Ааптар хаартыскаҕа түһэриилэрэ.