Уопсастыба

Саха сирин ойуурун инвентаризациялааһын үлэтэ түмүктэннэ



Арассыыйа судаарыстыбата ойуурга, ойуур пуондатыгар сыһыаннаан ыытар бэлиитикэтин «Рослесинфорг» федеральнай судаарыстыбаннай тэрилтэ сүрүннүүр. Бу тэрилтэ дойду үрдүнэн 37 салаалааҕыттан биирдэстэрэ — Саха сиринээҕи салаа буолар.

edersaas.ru.

Арассыыйа Федерациятыгар ойуур хаһаайыстыбатын 2014-2020 сс. сайдыыта” судаарыстыбаннай бырагыраама чэрчитинэн, «Рослесинфорг» ойууру инвентаризациялааһын, учуоттааһын үлэтин тэрийэн ыытар. Ойууру учуоттуур үлэ баай хара тыа туругун, көрүҥүн, хайдах сайдан, уларыйан-тэлэрийэн иһэрин туһунан чахчылары хомуйар, түмэр, докумуоннуур итиэннэ ойуур пуондатын саппааһын, боруодатын, сааһын быһаарар чахчылар базаларын тэрийэр, хаҥатар сыалтан оҥоһуллар.

Саха Өрөспүүбүлүкэтигэр судаарыстыбаннай суолталаах бу үлэ үс сыл устата ыытылынна. Бастакы сылга, 2018 с., Амма, Бүлүү, Горнай, Мэҥэ Хаҥалас, Нам, Нерюнгри, Уус Алдан, Уус Маайа, Хаҥалас, Чурапчы уонна Дьокуускай куорат лесничестволарыгар 41 мөл. гектар ойууру хабан учуоттуур дьаһаллар ыытыллыбыттара. 2019 с. Алдан, Эдьигээн, Мииринэй, Ньурба, Сунтаар, Үөһээ Бүлүү, Ленскэй, Өлүөхүмэ, Таатта лесничестволарынан 119,3 мөл. гектар ойуур докумуоннаммыта. Быйылгы түмүк түһүмэххэ үлэ саамай хотугу түбэҕэ, Дьааҥы, Индигир, Халыма, Сангаар, Томпо лесничестволарыгар, барыта 94 мөл. гектар ойуурга ыытылынна. Коронавирус пандемиятынан сибээстээн, төһө да уустуктар баалларын үрдүнэн, хонуутааҕы биригээдэлэр туруоруллубут сыалларын-соруктарын толордулар.

Ойууру учуоттааһын матырыйаалларын хомуйарга, оҥорорго уонна аныгы ирдэбилинэн сыыппара технологиятыгар киллэрэргэ биһиэхэ сыллата үрдүкү тэрилтэбит («Рослесинфорг») 18 араас салааларыттан биир идэлээхтэрбит кэлэн көмөлөстүлэр. Ол курдук, бу үс сыл устатыгар Омскай, Томскай, Амур, Чита уобаластарыгар, Коми өрөспүүбүлэтигэр баар салаалар уонна Вологдаттан «Севлеспроект» тэрилтэ исписэлиистэрэ кэлэннэр, 1176 боруобалыыр былаһаакканы төрүттээтилэр. Сүүстэн тахса араас көрдөрүүнэн анаалыстары оҥороннор, ойуур маһын уопсай саппааһын, хаачыстыбатын, эттиктэрин састаабын, тыа араас көрүҥнэринэн төһө углерод баарын, буорун уонна экологиятын туругун, айылҕа пааркаларыгар олордуллубут мастар төһө олохсуйан үүнэн эрэллэрин о.д.а. быһаардылар. Биһиги Экология, айылҕаны туһаныы уонна ойуур хаһаайыстыбатын министиэристибэтин кытары ситимнээхтик үлэлээммит, хонуутааҕы биригээдэлэри уонна кинилэр туттар тэриллэрин миэстэтигэр тиэрдэр тырааныспары хааччыйан, ойууру инвентаризациялааһын үлэтэ кэмигэр итиэннэ былааннаммытын курдук толору ыытылларын тэрийдибит.

Өрөспүүбүлүкэбит тайаан сытар сирэ-уота төһө даҕаны киэҥ нэлэмэн буоллар, бүтүн Арассыыйаттан түмсүбүт исписэлиистэр үтүө суобастаах үлэлэрин түмүгэр, Саха сирин баай хара тыатын судаарыстыбаннай инвентаризацията түмүктэннэ. Аны кэлэр өттүгэр бу хомуллубут чахчылары, кээмэйдэри ырытар, сааһылыыр, түмүктэри оҥорор уустук үлэ кэтэһэр. Ойуур судаарыстыбаннай инвентаризациятын кэмигэр хомуллубут чахчылар ойуур комплексын сайдыытын былааннааһыҥҥа, тыа үүнүүтүн, маһы олордууну барыллыырга, ойуур хаһаайыстыбатын салайыы ситимин итиэннэ ойууру туһаныллыытын тэрийиини тупсарарга тирэх буолуохтара.

Саргылаана Аммосова,

«Рослесинфорг» ФСТ Саха сиринээҕи салаатын дириэктэрэ,

Арассыыйа үтүөлээх лесовода.

0
0

Санааҕын суруй