Саха сирин уопсастыбаннаһа Амма баһыгар ойууру кэрдээччилэри кытаанахтык хонтуруоллуулларын ирдээтэ
Саха сирин киин оройуоннарын олохтоохторо уонна учуонайдар видеоселектор эрэсииминэн экология министиэристибэтигэр Алдан оройуонугар маһы соҕотуопкалааһын сабыдыалын үөрэтэллэригэр көрдөстүлэр. Биэдэмистибэ анал хамыыһыйа тэрийиэҕэ.
edersaas.ru
Экология министиэристибэтин иһитиннэриитинэн, Амма баһыгар 350 тыһыынча куб мас кэрдиллэр. Маныаха Алдан оройуонугар сыллата айылҕаҕа хоромньута суох 3,3 мөлүйүөн куб маһы кэрдэр көҥүллэнэр.
Сүбэ мунньахха уопсастыбаннас уонна учуонайдар быйыл куонкуруска олохтоох хампаанньалар буолбатах тэрилтэлэр кыайбыттарыттан дьиксинэллэр. Манан сибээстээн мас кэрдээччилэргэ хонтуруолу күүһүрдэри ыйдылар. Маны сэргэ мас кэрдии айылҕа туругар уонна аан дойду саамай ыраас уутугар сабыдыалын үөрэтии ирдэнэр.
“Бу бэнидиэнньиккэ миниистир кэккэ сорудахтары биэрдэ, ол иһигэр коронавирус пандемиятын туруга көннөҕүн, бары интэриэстээх өрүттэри түмэн, “төгүрүк остуолу” ыытарга”, — диэтэ мунньах кыттыылаахтарыгар миниистири солбуйааччы Алексей Агеев.
Министиэристибэ бэрэстэбиитэлэ үөскээбит боппуруоһу сиһилии үөрэтэргэ анал хамыыһыйа тэрийэр наадатын кытта сөбүлэстэ.
Аркадий Васильев, СИА
Бэлэмнээтэ Женни СТРЮКОВА, “Саха сирэ” хаһыат
Хаартыска: oreke.ru