Саха сирин баһылыга Ленинград блокадатын кыттыылаахтарын кытта көрүстэ

Бүгүн, тохсунньу 27 күнүгэр, Ленинграды фашист төгүрүктээһиниттэн олоччу босхолооһун 76-с сылын чэрчитинэн Саха сирин Ил Дархана Айсен Николаев СӨ Национальнай ойуулуур-дьүһүннүүр мусуойугар Ленинград блокадатын кыттыылаахтарын кытта көрүстэ.

edersaas.ru

Айсен Николаев тохсунньу 27 күнүгэр судаарыстыбабыт уонна 1941-1945 сыллардааҕы Аҕа дойду Улуу сэриитин историяларыгар биир бэлиэ күн бэлиэтэнэрин эттэ. “Ленинграды ньиэмэс-фашист талабырдьыттарын төгүрүктээһиннэриттэн толору босхолооһун – бу кутурҕаннаах бэлиэ күн. Блокада 872 күн барбыта уонна 3 мөлүйүөн кэриҥэ киһилээх куоракка сэрии бүтэригэр 500 тыһыынчаттан тахса эрэ киһи хаалбыта. Бүгүн сэрии сылларыгар балтараа мөлүйүөн Ленинград олохтооҕо өлбүтүн туһунан этэллэр. Биһиги ытык иэспит – дьиҥнээх историяны уонна бу хомолтолоох түгэн туһунан өйдөбүнньүгү илдьэ сылдьыы уонна бу туһунан эдэр көлүөнэҕэ тириэрдии”, — диэн өрөспүүбүлүкэ баһылыга бэлиэтээтэ.
Билигин Саха сиригэр Ленинград блокадатын 20-тэн тахса кыттыылааҕа олорор, кинилэри дьоруой-куорат Ленинград блокадниктарын норуоттар икки ардыларынааҕы ассоциациятын эрэгийиэннээҕи салаата түмэр.
“2016 сыллаахха дьоруой-куорат Ленинград блокадниктарын норуоттар икки ардыларынааҕы ассоциациятын XXV сийиэһигэр өрөспүүбүлүкэбит киин куората — Дьокуускай Санкт Петербуру кытта тэҥҥэ бу ассоциация састаабыгар киирбитэ. Сийиэс Санкт Петербурга Смольнайга ыытыллыбыта, манна Саха сирин дэлэгээссийэтин аатыттан миэхэ тыл биэрбиттэрэ. Мин Ил Дархан Айсен Николаев аатыттан эҕэрдэ тылы аахпытым. Ити кэнниттэн миэхэ үгүс дьон Саха сиригэр өрөспүүбүлүкэ салалтатын өттүттэн Ленинград төгүрүктээһинин кыттыылаахтарыгар улахан болҕомто уурулларын бэлиэтээбиттэрэ. Эрэгийиэннээҕи салаа өрөспүүбүлүкэ салалтатын кытта ыкса үлэлиирин эппиттэрэ. Ити иһин эһиэхэ дириҥник махтанабын”, — диэтэ ассоциация эрэгийиэннээҕи салаатын бэрэссэдээтэлэ Лилия Мустафина уонна өрөспүүбүлүкэ Ил Дарханыгар былырыын тахсыбыт кинигэни бэлэхтээтэ.
Блокада кыттыылаахтарын оҕолоро эмиэ тыл эттилэр. Кинилэр бу ыар түгэни умнубакка илдьэ сылдьар уонна үүнэр көлүөнэҕэ бу өйдөбүнньүгү тириэрдэргэ туһуттан уопсастыбаннай тэрилтэ тэриммиттэр. Бу тэрилтэ өрөспүүбүлүкэ үөрэх тэрилтэлэрин кытта ыкса үлэлэһэр, үөрэнээччилэри кытта көрсүһүүлэри тэрийэр эбит.
“Кыайыы волонтердара” Бүтүн Арассыыйатааҕы хамсааһын Саха сиринээҕи эрэгийиэннээҕи салаатын салайааччыта Алгыс Петров бу салаа былырыын саас тэриллэн, өрөспүүбүлүкэ улуустарыгар Кыайыы волонтердара баалларын кэпсээтэ. “Быйыл Ленинграды фашист төгүрүктээһиниттэн олоччу босхолооһун 76-с сылын чэрчитинэн “Блокада килиэбэ” аахсыйаны ыыттыбыт. Арассыыйаҕа Кэриэстэбил уонна Албан аат сылыгар уонна Саха сиригэр Ийэ дойдуга бэриниилээх буолуу сылыгар өрөспүүбүлүкэҕэ ыытыллар бары тэрээһиннэргэ уонна бырайыактарга күүскэ кыттыахпыт, бэтэрээннэргэ болҕомтобутун ууруохпут”, — диэтэ кини.
Көрсүһүү түмүгэр Саха сирин Ил Дархана Айсен Николаев өрөспүүбүлүкэҕэ Ийэ дойдуга бэриниилээх буолуу сылынан көхтөөх уопсастыбаннай хамсааһын саҕаламмытын бэлиэтээтэ уонна бүгүҥҥү тэрээһин Улуу Кыайыы 75 сылыгар анаммыт үбүлүөйдээх тэрээһиннэртэн биирдэстэрэ буоларын эттэ. Ил Дархан бэтэрээннэргэ уонна блокада кыттыылаахтарыгар чэгиэн доруобуйаны, уһун олоҕу баҕарда.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин хаартыската. СИА

Бэлэмнээтэ Женни Стрюкова