Алтынньы 17 күнүгэр Саха сирин баһылыга Айсен Николаев өрөспүүбүлүкэ киин куоратын мэдиссиинэ тэрилтэлэрин көрүүтүн кэмигэр куорат саҥа эбийиэгэр сырытта. Ил Дархан үлэһиттэр үлэлиир усулуобуйаларын, тиэхиньиичэскэй хааччыллыыны кытта билистэ уонна суһал көмө саҥа массыыналарын көрдө-иһиттэ.
Айсен Николаев РФ Бырабыыталыстыбатын быһаарыытынан Дьокуускай куорат наадалаах тэриллэринэн сэбилэммит суһал көмө 14 аныгы массыынатын ылбытын, ону тэҥэ саҥа ыстаансыйаны арыйыы көмөтүнэн – суһал көмө ыарыһахтарга тиийииитэ суһал буолбутун бэлиэтээтэ.
“Дьон-сэргэ маны хайы-үйэ биллэ. Билигин Марха, Тулагы, Кангаласс олохтоохторугар мэдиссиинэ көмөтө быдан түргэнник уонна кэмигэр оҥоһуллар буолла”, — диэн эрэгийиэн баһылыга бэлиэтээтэ.
Өрөспүүбүлүкэ киин куоратын хоту чааһын олохтоохторо бу иннинэ суһал көмө кэлиитигэр ыарахаттары көрсөллөрө. Бу пуорт оройуонугар, Сатал түөлбэ, Марха, Тулагы, Кангаласс олохтоохторугар сыһыаннаах. Суһал көмө массыыналара Петр Алексеев уулуссатыгар баар өрөспүүбүлүкэтээҕи балыыһаттан дьон ыҥырыытыгар баралларыгар суолга харгыстан дьону быыһыыр күндү бириэмэлэрин сүтэрэллэрэ.
Ил Дархан уонна Бырабыыталыстыба пресс-сулууспата.
Женни Стрюкова, бэлэмнээтэ.
Хаартыска: тустаах саайтан