Саха сирин 100 креативнай лидерин таллылар

Ааптар: 
Бөлөххө киир:

Арассыыйатааҕы Креативнай индустрия федерацията уонна СӨ Сайыннарар корпорация кыттыһан үс ый устата “Саха сирин 100 креативнай лидерэ” бырайыак иитинэн чинчийии ыытан өрөспүүбүлүкэ лидердэрин таллылар.

edersaas.ru

Креативнай индустрия федерациятын генеральнай дириэктэрэ Игорь Намаконов: “Эрэгийиэҥҥэ чинчийии ыытарбытыгар биһиги тугу бэлиэтии көрдүбүт? Эрэгийиэннэр, бу чинчийии баар да буоллун, суох да буоллун, онтон тутуллубакка үлэлээбиттэрин курдук үлэлиир, көхтөөх, балачча элбэх бириэмэлэрин толкуйдарын, өйүктэрин олоххо киллэриигэ аныыр, бэйэлэрин тула түмсүү тэрийэр, күүстээх дьоҥҥо наадыйаллар.

Ол эрээри, бу омсолоох өрүтэ, сорохтор ордук күүстээх миэстэлэргэ, куораттарга талаһан симэлийэ быһыытыйаллар.

Биһиги сорукпут – лидердэри булан, куолас биэрэн, болҕомто ууран эрэгийиэн олоҕор көхтөөхтүк кытталларын көҕүлээһин”, — диэн эттэ.

Бэлиэтээн эттэххэ, Саха сирин 100 бастыҥ лидерин кэккэтигэр “Сахамедиа” тэрилтэттэн үс киһи — “Саха сирэ” хаһыат сүрүн эрэдээктэрэ Чокуур Гаврильев, “Саха сирэ” хаһыат таһаарааччы эрэдээктэрэ Анивера Акимова, Саха иһитиннэрэр ааҕыныстыбатын (ЯСИА) анал кэрэспэдьиэнэ Николай Борисов киирдилэр.

“Саха сирэ” хаһыат сүрүн эрэдээктэрэ Чокуур Гаврильев:

— Айар куттаах дьону кытта испииһэккэ киирбиппиттэн үөрдүм. Эспиэртэр куоластаабыттарын иллэрээ күн эрэ истибитим. Сонуну киэҥник тарҕатар эйгэҕэ өр сылларга үлэлээбиппин бэлиэтээбиттэр эбит. Бу аҥардас мин эрэ айар-тутар ситиһиим буолбатах, бииргэ үлээбит, үлэлии сылдьар айар куттаах дьонум сыратын түмүгэ. Ол сыаналаммытыттан, испииһэккэ киирбиппинэн киэн туттабын.

Биир идэлээхтэрбин Анивера Акимованы, Николай Борисовы уонна испииһэккэ киирбит дьону барыларын эҕэрдэлиибин, ситиһиини баҕарабын, — диэн санаатын үллэһиннэ.

“Саха сирэ” хаһыат таһаарааччы эрэдээктэрэ Анивера Акимова:

— Маннык бырайыак баарын урут истибитим. Ол гынан баран, сүүмэрдиир куонкурус буола турарын билбэт этим. Бүгүн кэллиэгэлэрбиттэн истэн олус соһуйдум, долгуйдум. Саха сирин олохтоохторуттан ала-чуо куоластааһыҥҥа киллэрбиттэриттэн кырдьык соһуйдум. Ол да буоллар, биһиги, суруналыыстар, өрөспүүбүлүкэ социальнай-экэнэмиичэскэй сайдыытыгар эмиэ улахан оруоллаахпыт. “Саха сирэ” хаһыат, edersaas.ru саайт өрөспүүбүлүкэ күннээҕи олоҕун сырдатыыга үгүс сырабытын уурабыт, — диэн эттэ.

Лидердэри ыйытык нөҥүө испииһэктээн, онтон эспиэртэр бэлиэтээн талаллар эбит. Ол иһин 100 лидер кэккэтигэр киирбиттэрин соһуйа истэллэрэ оруннаах. Испииһэги манна көрүөххүтүн сөп.

Кылгастык сыыппараҕа тохтоон аастахха, лидердэр 50 % — эр дьон, 34 % — дьахталлар, 16 % — хамаандалар эбит. Аны ааттарынан ылан көрдөххө, Дмитрий, Алексей, Иван, Наталья, Анна, Надежда диэн ааттаахтар элбэхтэр.

Людмила ПОПОВА, “Саха сирэ” хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0