Саха сиригэр ыксаллаах быһыы-майгы кэмигэр эмсэҕэлээбиттэргэ төлөбүрү биэриигэ онлайн-ситими үлэлэтэн көрдүлэр
Саха сирин 78 олохтооҕо ыксаллаах быһыыттан-майгыттан эмсэҕэлээбиттэргэ төлөбүрү биэриигэ электроннай ситими тестээһиҥҥэ кытынна. Бу туһунан өрөспүүбүлүкэ бастакы вице-премьерэ Дмитрий Садовников Бүтүн Арассыыйатааҕы хамаанда-ыстаабын үөрэтии кэмигэр эттэ.
Уопсайа үбүнэн көмөлөһөр туһунан 113 сайабылыанньа киирбитэ, ол иһигэр судаарыстыба өҥөлөрүн порталыгар – 21, МФЦ –22, олохтоох салайыныы уорганыгар –35.
“Бары киирбит сайабылыанньалар судаарыстыба сервиһин платформаларыгар тус кэбиниэттэргэ регистрацияламмыттар уонна биэдэмистибэлэр икки ардыларыгар электроннай хардарыта үлэлээһин көмөтүнэн бэрэбиэркэлэммиттэр. 113 сайабылыанньаттан 55 обработкаламмыт, итилэртэн 47 киһиэхэ төлөбүрү аныыр туһунан быһаарыллыбыт, 8-ка араас биричиинэнэн аккаастааммыт”, — диэтэ Садовников.
Кини дьоҥҥо баайдарын-дуолларын сүтэрбиттэринэн үбүнэн көмөнү оҥоруу СӨ экологияҕа, айылҕаны туһаныыга уонна ойуур хаһаайыстыбатын куратордаһынынан аан бастаан тестээһини ааспытын бэлиэтээтэ.
“Докумуоннары бэлэмнээһин уонна быһаарыылары ылыныы механизмын бары билэбит. Тестээһин барыллаан түмүктэрэ көрдөрбүтүнэн, бу ньыманы олоххо киллэрии өрөспүүбүлүкэ Бырабыыталыстыбатыгар ыарахан балаһыанньаҕа түбэспит дьоҥҥо түргэнник көмөлөһөргө төһүү буолуоҕа”, — диэн эбэн эттэ Бырабыыталыстыба бэрэссэдээтэлин бастакы солбуйааччы.
Санатан эттэххэ, Саха сиригэр ыксаллаах балаһыанньа үөскүүр түөлбэтигэр олорор дьонтон бөлөх тэриллибитэ. Кинилэр быстах олорор сирдэригэр судаарыстыбанай өҥө биир кэлим электроннай порталын нөҥүө сайабылыанньа биэрэр кыахтаахтар эбэтэр “Дьокуускай куорат” куораттааҕы уокурук олохтоох салайыныы уорганыгар эбэтэр МФЦ тиийиэхтэрин сөп.
Инникитин айылҕа иэдээниттэн уонна техногеннай көрүҥнээх ыксаллаах быһыыттан-майгыттан эмсэҕэлээбит дьоҥҥо төлөбүрдэргэ электроннай судаарыстыба өҥөтө судаарыстыба порталыгар куруук үлэлиир кыахтаах.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаарытска: тустаах саайтан