Бүгүн Туймаада ыһыаҕар Япония улахан дэлэгээссийэтэ кытта сылдьар. Дэлэгээссийэни икки улахан судаарыстыбаннай деятеллэр Япония экономикатын, атыытын, промышленноһын миниистирэ, экономика эйгэтигэр Россияны кытары үлэлэһэр миниистир Хиросигэ Сэко уонна Наука, технология миниистирэ Масадзи Мацуяма салайан илдьэ кэллилэр.
Кинилэр бүгүн сарсыарда уон биир чааска диэри икки мунньахха кытыннылар. “Ил Дархан э.т. Айсен Николаевы кытары көрсөн, Япония уонна Россия бииргэ үлэлэһэргэ түһэрсибит аҕыс пууннаах дуогабардарын чэрчилэринэн, олоххо киириэхтээх бырайыактарбытын ырыттыбыт. Саха сиригэр өссө ханнык бырайыактарга үлэлэһиэхпитин сөбүн көрдүбүт. Ити кэннэ икки структура, Россия Федерациятын Сэбиэтин уонна Япония парламенын, холбоһуктаах мунньаҕа буолла. Манна Япония өттүттэн Россияны кытары үлэлэһэр уонна Россия өттүттэн парламеннар, регионнар икки ардыларыгар үлэлэһэр депутаттар кыттыыны ыллылар. Саха сирэ Уһук Илин регионнарга улахан оруолу ылар. Онуоха киин бырабыыталыстыбалар, парламеннар, Россия уонна Япония, өйүүллэрэ наада”, — диэн этэр суруналыыстары кытары көрсүһүүгэ Экономика миниистирэ Хиросигэ Сэко.
Дэлэгээссийэ сарсын эбийиэктэри кэрийиэҕэ. Бастатан туран, Сыырдаахха тутуллубут кыһыннары үлэлиир теплицаҕа сылдьыаҕа. “Бу эбийиэк Россия, Япония бииргэ үлэлэһиилэрин түмүгэр олоххо киирбитэ. Ону таһынан бөҕү иккистээн туһаҕа таһаарыы кыра собуотун көрүөхпүт. Бу маннык кыра собуоту бэйэм харахпынан көрүөхпүн баҕарабын”, — диэн бэлиэтиир Хиросигэ Сэко.
Ону таһынан кини Саха сиригэр бу бастакы кэлиитин туһунан суруналыыстары кытары көрсүһүүтүгэр эттэ.
— Саха сирэ олус киэҥин уонна кэрэ айылҕалааҕын истэн эрэ билэрим. Онон Саха сирин илэ харахпынан көрө кэлбиппиттэн астынабын. Бүгүн национальнай бырааһынньыкка Ыһыахха сылдьан саха норуотун үгэһин, култрууратын кытары билсиэм. Ону таһынан Өлүөнэ очуостарын көрүөхпүт, — диэн этэр кини.
Аграфена КУЗЬМИНА, “Саха сирэ” хаһыат, edersaas.ru.